धुलिखेल । नेफ्स्कूनको आयोजनामा  “साकोस जोखिम व्यवस्थापन ३६० कार्यशाला” काभ्रे जिल्लाको धुलिखेलमा जेठ १९ गते सम्पन्न भएको छ । 

कार्यक्रमको उद्घाटन संघका कोषाध्यक्ष दिपक थापाले व्यानर पढेर गर्नुभएको थियो । कार्यशालामा काभ्रे र सिन्धुपाल्चोक जिल्लाका १५ वटा साकोसका २९ जना प्रतिनिधिहरुको सहभागीता रहेको थियो । 

कार्यशालामा सहभागीहरूले सहकारी संस्थामा देखिन सक्ने सम्भावित जोखिमहरूको पहिचान, जोखिम न्यूनीकरणका उपायहरू तथा दिगो व्यवस्थापन प्रणाली विकास सम्बन्धी विषयमा विस्तृत छलफल गरेका थिए । साथै, स्क्यान कार्यक्रमका सूचकहरू तथा जोखिममा आधारित सुपरिवेक्षण प्रणालीबारे समेत गहन समीक्षा गरिएको थियो ।

सहकारी संघ तथा नियामक निकायमा नियमित रूपमा पेश गर्नुपर्ने विवरण, प्रतिवेदन तथा अभिलेख व्यवस्थापनलाई व्यवस्थित र पारदर्शी बनाउने विषयमा समेत विस्तृत छलफल भएको थियो । तरलता व्यवस्थापन योजना, सम्भावित वित्तीय संकटबाट बच्ने रणनीति, संस्थागत स्थायित्व कायम गर्ने उपाय तथा सदस्यहरूको विश्वास अभिवृद्धि गर्ने विषयमा सहभागीहरूबीच सामूहिक प्रतिबद्धता व्यक्त भएको थियो ।

सहभागीहरूले यस्ता क्षमता अभिवृद्धिमूलक कार्यक्रमहरूले सहकारी क्षेत्रलाई थप व्यवस्थित, सुरक्षित तथा उत्तरदायी बनाउन महत्वपूर्ण योगदान पु¥याउने धारणा व्यक्त गर्दै कार्यशालाबाट प्राप्त सिकाइ तथा अनुभवलाई आफ्ना संस्थाहरूमा व्यवहारिक रूपमा कार्यान्वयन गर्ने प्रतिबद्धता समेत जनाएका छन् । कार्यशालाको सहजीकरण  कर्जा असुली न्ययधिकरणका अधृकृत नबिन मैनाली, नेफ्स्कूनका बरिष्ठ अधिकृत प्रेम नाथ वाग्ले , बरिष्ठ सुचना प्रबिधि अधिकृत कृपेश लामिछाने र संघका कार्यक्रम अधिकृत राजन सुबेदीले गर्नुभएको थियो  भने कार्यक्रम सञ्चालन नेफ्स्कून सदस्य सेवा कार्यालयका इन्चार्ज उमेश कोइरालाले गर्नुभएको थियो ।