सर्लाही । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले नियमित निरीक्षण तथा अनुगमन (स्क्यान) कार्यक्रम अन्तर्गत सर्लाही स्थित सगुन बचत तथा ऋण सहकारी संस्था लिमिटेड  को दोस्रो स्थलगत सुपरिवेक्षण जेठ २१ गते सम्पन्न गरेको छ।

सहकारी क्षेत्रमा सुशासन, दिगोपन तथा वित्तीय अनुशासन प्रवर्द्धन गर्ने उद्देश्यले नेफ्स्कूनले नियमित रूपमा स्थलगत सुपरिवेक्षण कार्यक्रम सञ्चालन गर्दै आएको हो ।

सुपरिवेक्षणका क्रममा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षा व्यवस्था, सम्पत्ति शुद्धीकरण निवारण तथा आतङ्कवादी क्रियाकलापमा वित्तीय लगानी नियन्त्रण (AML/CFT) सम्बन्धी नीति, साथै भाखा नाघेका ऋणको असुली अवस्थाको मूल्याङ्कन गरिएको थियो।

सुपरिवेक्षणको मुख्य उद्देश्य सहकारी संस्थाहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तीकरणलाई प्रोत्साहन गर्नु तथा बचतकर्तामाझ विश्वास अभिवृद्धि गर्नु रहेको छ।

कार्यक्रममा नेफ्स्कूनका कार्यक्रम अधिकृत महेश वराल तथा संस्थाका अध्यक्ष, उपाध्यक्ष, सचिव, सञ्चालक समिति सदस्य, व्यवस्थापक लगायत उच्च व्यवस्थापन तहका कर्मचारीहरूको सहभागिता रहेको थियो।