सुर्खेत । सुर्खेतको वीरेन्द्रनगरमा ’साकोस जोखिम व्यवस्थापन ३६० कार्यशाला’ सम्पन्न भएको छ । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को आयोजनामा जेठ २४ गते उक्त कार्यक्रम सञ्चालन गरिएको हो ।

कार्यशालामा कर्णाली प्रदेशका विभिन्न १२ वटा बचत तथा ऋण सहकारी संस्थाबाट २४ जना प्रतिनिधिहरूको सहभागिता रहेको थियो । नेफ्स्कूनका सुर्खेत सदस्य सेवा कार्यालय प्रमुख विष्णुदत्त जोशीले सञ्चालन गर्नुभएको उक्त कार्यक्रममा पवनजंग मल्लले स्वागत मन्तव्य राख्दै कार्यक्रमको उद्देश्यमाथि प्रकाश पार्नुभएको थियो भने कार्यक्रमको व्यवस्थापन दीपकराज जोशी र गजेन्द्र बहादुर साउँदले गर्नुभएको थियो ।

कार्यक्रमको प्रशिक्षण सेसनमा अधिवक्ता प्रियहरी भण्डारीले ऋण असुलीको कानुनी प्रक्रिया, कर्जा असुली न्यायाधिकरण र कर्जा सूचना केन्द्रको भूमिकाका विषयमा विस्तृत रूपमा सहजीकरण गर्नुभएको थियो । सहभागीहरूले उठाएका विभिन्न कानुनी जिज्ञासा र समस्याहरूको समाधान समेत गर्नुभएको थियो । त्यसैगरी, कार्यशालाकै अर्को सेसनमा नेफ्स्कूनका व्यवसाय अधिकृत पवनजंग मल्लले नेपालको सहकारी अभियानको वर्तमान अवस्था, यस क्षेत्रमा देखा परेका चुनौती र आगामी मार्गचित्रका बारेमा स्पष्ट पार्नुभएको थियो ।

कार्यक्रमको समापन गर्दै अध्यक्ष एवं नेफ्स्कून सुर्खेत सदस्य सेवा कार्यालय व्यवस्थापन उप–समिति सदस्य भुपेन्द्र बहादुर सिंहले कार्यशाला अत्यन्तै समयसान्दर्भिक र प्रभावकारी रहेको बताउनुभयो । उहाँले सहकारीहरूमा भाखा नाघेको कर्जा असुली गर्न अबका दिनमा कानुनी प्रक्रियालाई नै प्राथमिकता दिनुपर्नेमा जोड दिनुभयो । साकोसहरूलाई सबल र दिगो बनाउनका लागि संघले सञ्चालन गरेको ’स्क्यान’ (SCAN) कार्यक्रमले महत्त्वपूर्ण भूमिका खेलेको उल्लेख गर्दै अध्यक्ष सिंहले कर्णाली प्रदेशका साकोसहरूका लागि यो कार्यक्रम फलदायी सावित भएको र आगामी दिनमा पनि नेफ्स्कूनले यस्ता कार्यक्रमहरूलाई निरन्तरता दिने जानकारी गराउनुभयो ।