काभ्रे । लक्ष्मी महिला बचत तथा ऋण सहकारी संस्था लिमिटेड, पनौती नगरपालिका–५ चौकोट, काभ्रेको आयोजनामा सञ्चालित दुईदिने “कृत्रिम फूलको गुच्छा बनाउने तालिम” जेठ २४ गते सम्पन्न भएको छ । 

जेठ २३ र २४ गते सञ्चालन गरिएको तालिम आइतबार आयोजित समापन समारोहका बीच औपचारिक रूपमा सम्पन्न गरिएको हो । 

समापन कार्यक्रममा प्रमुख प्रशिक्षक लक्ष्मी श्रेष्ठले तालिमप्रति सहभागी सदस्यहरूको उत्साह, लगाव र सक्रिय सहभागिताले आफूलाई उत्साहित बनाएको बताउनुभयो । तालिमले सहभागीहरूको सीप अभिवृद्धि मात्र नभई स्वरोजगार तथा आयआर्जनका अवसर सिर्जना गर्न महत्वपूर्ण भूमिका खेल्ने विश्वास व्यक्त गर्नुभयो ।

उक्त अवसरमा बनेपा, धुलिखेल र पनौती नगरपालिकाबाट सहभागी भएका प्रशिक्षार्थीमध्ये उत्कृष्ट प्रदर्शन गर्ने सदस्यहरूलाई पुरस्कार प्रदान गरिएको थियो । साथै, तालिम सफलतापूर्वक सम्पन्न गरेका सबै प्रशिक्षार्थीलाई प्रमाणपत्र वितरण गरिएको थियो भने प्रशिक्षक तथा अतिथिहरूलाई मायाको चिनो प्रदान गरी सम्मान गरिएको थियो ।

संस्थाका अध्यक्ष हिमाली श्रेष्ठले दुईदिने तालिम अवधिभर सहभागीहरूसँगै रहेर कार्यक्रमको अवलोकन गर्नुभएको थियो । समापन समारोहलाई सम्बोधन गर्दै उहाँले तालिमबाट प्राप्त ज्ञान र सीपलाई व्यवहारमा उतार्न तथा पार्टटाइम वा व्यवसायिक रूपमा उपयोग गर्न सहभागीहरूलाई आग्रह गर्नुभयो । लक्ष्यभन्दा बढी सहभागिता, सक्रियता र विश्वास देखिएको उल्लेख गर्दै उहाँले यस्ता सदस्य–केन्द्रित कार्यक्रमप्रति संस्थाको उत्साह थप बढेको बताउनुभयो ।

अध्यक्ष श्रेष्ठले संस्थाको वार्षिक कार्ययोजना अनुरूप आगामी दिनमा पनि सदस्यहरूको क्षमता अभिवृद्धि तथा आर्थिक सशक्तीकरणमा केन्द्रित यस्ता कार्यक्रमहरूलाई निरन्तरता दिइने जानकारी दिनुभयो ।

शिक्षा उपसमिति संयोजक शकुन्तला श्रेष्ठको अध्यक्षतामा सम्पन्न कार्यक्रममा उहाँले प्रशिक्षार्थी, प्रशिक्षक, सञ्चारकर्मी तथा शुभेच्छुकहरूप्रति आभार व्यक्त गर्नुभयो । तालिमले सदस्यहरूको सीप विकासका साथै अतिरिक्त आयआर्जनको आधार तयार गर्ने विश्वास व्यक्त गर्दै कार्यक्रम समापन भएको घोषणा गर्नुभएको थियो ।

सहकारी संस्थाले सदस्यहरूको क्षमता विकास, उद्यमशीलता प्रवद्र्धन तथा आर्थिक आत्मनिर्भरतामा टेवा पु¥याउने उद्देश्यले यस्ता व्यावहारिक तथा सीपमूलक तालिमलाई निरन्तरता दिँदै आएकोे छ ।