क्वालालम्पुर । रसुवाको भोटेकोशी बाढीबाट प्रभावित बचत तथा ऋण सहकारी संस्थाहरूको पुनरुत्थानका लागि दक्षिण कोरियाली केन्द्रीय बचत संघ (नाकूफोक) ले ५० हजार अमेरिकी डलर सहयोग गरेको छ ।

मलेसियाको राजधानी क्वालालम्पुरमा जारी एशियन क्रेडिट युनियन फोरम–२०२६ का अवसरमा आयोजित कार्यक्रममा नाकूफोकले उक्त सहयोग हस्तान्तरण गरेको एसियन क्रेडिट युनियन नेटवर्क (अकू) का कोषाध्यक्ष तथा नेपाल बचत तथा ऋण केन्द्रीय सहकारी संघ (नेफ्स्कून) का अध्यक्ष चन्द्रप्रसाद ढकालले जानकारी दिनुभयो ।

ढकालका अनुसार भोटेकोशी बाढीबाट प्रभावित सहकारीका लागि यो हालसम्म अन्तर्राष्ट्रिय सहकारी क्षेत्रबाट प्राप्त भएको सबैभन्दा ठूलो सहयोग हो । अन्य केही अन्तर्राष्ट्रिय सहकारी संस्थाहरूले पनि आर्थिक सहयोग गर्ने प्रतिबद्धता जनाएका छन् ।

“कसैले एक हजार, कसैले दुई हजार अमेरिकी डलरसम्म सहयोग गर्नुभएको छ । प्राप्त सबै सहयोगको अभिलेख राखेको बताउनु भएको छ । भदौ १० गते आएको विनाशकारी रसुवा जिल्लाको भोटेकोशी बाढीबाट प्रभावित क्षेत्रका बचत तथा ऋण सहकारी संस्थाहरूको पुनःस्थापना र पुनरुत्थानका लागि उक्त रकम परिचालन गरिने बताइएको छ ।

यसैगरी, नेपालका लागि अन्तर्राष्ट्रिय सहकारी महासंघ (आईसीए) तथा विश्व ऋण परिषद् (ओकू) लगायतका अन्तर्राष्ट्रिय संस्थाबाट थप सहयोग जुटाउने प्रयास भइरहेको अध्यक्ष ढकालले जानकारी दिनुभएको छ ।