काठमाडौं । प्रदेश नं २ को सहकारी ऐन प्रदेश सभाबाट पारित भएर  प्रमाणीकरणको पर्खाइमा रहेको छ । “प्रदेश संसदबाट पारित भएर प्रमाणीकरणको लागि प्रदेश प्रमुखको कार्यालयमा पठाइएको छ तर अहिलेसम्म प्रमाणित भएको छैन,” प्रदेश नं २ स्थित भूमि व्यवस्था, कृषि तथा सहकारी मन्त्रालयका प्रशासन जनशक्ति तथा सहकारी महाशाखा प्रमुख ओम नारायण झाले साकोस आवाजलाई जानकारी गराउनुभयो । कोभिड संक्रमणको सुरुवाती चरणमा घोषणा गरिएको लकडाउन अगाडि बसेको प्रदेश सभाले सहकारी ऐन पारित गरेको उहाँले बताउनुभयो । “चैतको पहिलो साता नै प्रदेश सभाले सहकारी ऐन पारित गरिसकेको थियो तर अझै प्रमाणीकरण भने भएको छैन” झाले भन्नुभयो,“ लकडाउन र कोभिड संक्रमणको बढ्दो दरका कारण पनि हुनसक्छ प्रमाणीकरण भने भएको छैन ।” बाँकी प्रदेशमा सहकारी ऐन लागू भैसकेको अवस्थामा प्रदेश नं २ मा भने अझै सहकारी ऐन जारी हुन नसक्दा प्रदेशस्थित सहकारी संघ संस्थाहरुले कठिनाई भोग्दै आएका छन् ।

मन्त्रालयका कर्मचारीलाई कोरोना
यसैबीच, प्रदेश सहकारी मन्त्रालयका १ कर्मचारीमा पनि कोरोना संक्रमण पुष्टि भएको छ । मन्त्रालयका अधिकृत विनित कुमार झामा भदौ अन्तिम तिर कोरोना संक्रमण पुष्टि भएपछि उहाँ अहिले घरमै आइसोलेसनमा बस्नुभएको छ भने मन्त्रालयमा पनि स्वास्थ्य सर्तकताका साथ न्यूनतम कर्मचारीहरुबाट काम भैरहेको झाले जानकारी गराउनुभयो ।