काठमाडौं । नेफ्स्कूनद्वारा उद्यमशीलता विकास तथा व्यवसाय व्यवस्थापन सम्बन्धी ३ दिने तालिम आयोजन गरिएको छ । अन्तर्राष्ट्रिय श्रम संगठन (आइएलओ) नेपालको वित्तीय तथा नेफ्स्कूनको प्राविधिक सहयोगमा आयोजित कार्यक्रममा विषय विज्ञ निर्मल सिग्द्येलले उद्यमशीलता विकासको अवधारणा, महत्व, विधिका साथै उत्पादन र बजारीकरण लगायतका विविध विषयमा सहजिकरण गर्नुभएको थियो भने नेफ्स्कूनकी कार्यक्रम अधिकृत रीता सुवेदीले सहजिकरण सहयोग गर्नुभएको थियो । तरकारी खेती तथा अन्य स्थानीय व्यापार व्यवसायमा संलग्न भक्तपुरस्थित बचत तथा ऋण सहकारी संस्थाका २ समूहमा विभक्त २५ जना सदस्यहरु कार्यक्रममा सक्रिय सहभागी हुनुभएको थियो । पहिलो समूहलाई असोज ५, ६ र ७ गते तथा दोस्रो समूहलाई ९, १० र ११ गते तालिम प्रदान गरिएको थियो ।

यसैबीच, आजको समापन समारोहमा प्रमुख अतिथि नेफ्स्कूनका पूर्व अध्यक्ष कैलाशभक्त प्रधानाङ्गले सहभागीहरुलाई सफल व्यवसायी बन्नका लागि तालिममा सिकेका कुराहरुलाई व्यवहारमा उतार्नुपर्ने बताउनुभयो । उहाँले अरु संघ संस्थाले दिन र नेफ्स्कूनले दिने तालिममा धेरै फरक हुने भन्दै व्यवहारोपयोगी तालिमका सिकाइहरु कार्यान्वयनमा ल्याउन सुझाव दिनुभयो । नेफ्स्कूनका कामु प्रमुख कार्यकारी अधिकृत प्रकाश प्रसाद पोखरेलले पनि सहभागीहरुलाई सिकेका कुराहरु कार्यान्वयन गर्न आग्रह गर्नुभयो । यसैगरी, नेफ्स्कूनका सदस्य सेवा विभाग प्रमुख दुर्गा प्रसाद ढकालले उद्यमशीलता समयको माग भएको भन्दै सहभागीहरुलाई स्थानीय श्रोत साधनको अधिकतम उपयोग गरी व्यवसायिक बन्न सुझाव दिनुभयो । नेफ्स्कूनका बरिष्ठ अधिकृत नवीनराज दाहालले समापन कार्यक्रम सञ्चालन गर्नुभएको थियो ।