काठमाडौं । G-20 मा सहकारीको संलग्नता विषयमा आज विश्व सहकारी अभियानकर्मीहरु भर्चुअल छलफलमा सहभागी हुँदैछन् । सन् २०१४ देखि अन्तर्राष्ट्रिय सहकारी महासंघ (आइसीए) र उसका सदस्यहरु G-20 संलग्नता समूहमा रहेर लगातार सहकारीका सम्बन्धमा छलफल चलाउँदै आएका छन् । विगतदेखि नै G-20 सम्मेलनमा सहकारी अभियन्ताहरुले साना तथा मझौला व्यवसाय, बेरोजगारी, शिक्षाका साथै जी–२० सदस्य राष्ट्रहरुलाई सहकारी सम्बन्धी सुझाव तथा नीतिगत परिवर्तनका विषयमा ध्यानाकर्षण गराउँदै आएका छन् ।

विश्व आर्थिक मञ्च G-20 मा विश्वका २० धनी राष्ट्रहरुको प्रतिनिधित्व छ । यो समूहमा एशिया प्रशान्त क्षेत्रका अष्ट्रेलिया, चीन, भारत, इन्डोनेसिया जापान, कोरिया र साउदी अरेबियाको प्रतिनिधित्व छ । यस वर्षको G-20 सम्मेलन साउदी अरेबियाले आयोजना गर्दैछ भने २ वर्षपछि हुने अर्को सम्मेलन भारतले आयोजना गर्दैछ । G-20 को १५ औं बैठक आगामी नोभेम्बर २१–२२ सम्म साउदी अरेबियाको राजधानी रियादमा आयोजना गरिदैंछ । कुल १९ राष्ट्र, तिनका केन्द्रिय बैंकका गर्भनरहरु र युरोपेली संघ (इयू) गरी २० वटाको समूह G-20 ले विश्व अर्थतन्त्रको ८० प्रतिशत हिस्सा ओगट्दछ ।

आज आयोजना हुने वेबिनारमा G-20  कार्यदलको बैठकमा सहभागी आइसीए सदस्य राष्ट्रका प्रतिनिधिहरुले सहकारीहरुले कसरी सक्रिया भूमिका खेल्न सक्छन् भन्ने विषयमा धारणा राख्ने कार्यक्रम छ । आजको अभौतिक कार्यक्रममा भारत, अष्ट्रेलिया, फ्रान्स लगायतका देशका सहकारी अभियानकर्मीहरुले धारणा राख्ने कार्यक्रम छ । कोभिड–१९ को विश्वव्यापी महामारीले अर्थतन्त्रमा पारेको प्रभाव र सहकारीमार्फत उद्यमशीलता, रोजगारी, आन्तरिक पर्यटन लगायतका सम्भावनाहरु छिचोल्ने विषयमा आजको वेबिनारमा छलफल हुनसक्ने बताइएको छ ।