भक्तपुर । जिल्लास्थित सामूहिक बचत तथा ऋण सहकारी संस्था लि. ले २३ औं स्थापना दिवसको अवसर पारेर स्थानीय कल्याण बचत तथा ऋण सहकारी संस्था लि.सँग एकीकरण सहमति गरेको छ ।  प्रमुख अतिथि भक्तपुर जिल्ला बचत तथा ऋण सहकारी संघका अध्यक्ष कृष्ण गोविन्द लाखाजुको उपस्थितिमा असोज २३ गते आयोजित कार्यक्रममा संस्थाका अध्यक्ष धनेशराज राजोपाध्याय र कल्याण साकोसका अध्यक्ष गंगा प्रसाद ख्याजुले सम्झौतापत्रमा हस्ताक्षर गरी एकीकरण सहमतिलाई औपचारिकता प्रदान गर्नुभएको थियो । सामूहिक साकोसका अध्यक्ष राजोपाध्यायले गतवर्ष पनि संस्थाले दुइ वटा संस्थासँग एकीकरण गरेको भन्दै कल्याणसँगको पछिल्लो एकीकरणले सहकारी अभियानलाई मजबूत बनाउने बताउनु भयो ।
संस्थाका सचिव कृष्ण हरि सैजुले संचालन गरेको कार्यक्रममा उपाध्यक्ष राजाभाई भेलेले सहभागीहरुलाई स्वागत गर्नुभएको थियो । संस्थाका लेखा सुपरिवेक्षण समिति संयोजक निन्यनाथ श्रेष्ठले सानो र सुुन्दर भन्दा पनि ठुलो र बलियो संस्थाले मात्र आफ्नो पहिचान बनाउन सक्ने वर्तमान परिस्थितिका कारण संस्थाले पनि एकीकरणलाई जोड दिएको धारणा राख्नुभयो ।  संस्थापक अध्यक्ष श्यमा प्रसाद मुनंकर्मीले निश्वार्थ गरिएको जुनसुकै कामको पनि राम्रो परिणाम आउने भन्दै सामूहिक साकोसको स्थापनाकाल स्मरण गर्नुभयो ।  
संस्थाका अध्यक्ष गंगाप्रसाद ख्याजुले सदस्यले पाउने वित्तीय सेवाको गुणस्तर वृद्धिका लागि अहिलेको अवस्थामा संस्था एकीकरण अपरिहार्य र अनिवार्य रहेको बताउनु भयो । प्रमुख अतिथि कृष्ण गोविन्द लाखाजुले सहकारी संस्थाहरु सहकारी मूल्य मान्यता, ऐन, नियम तथा समुदायमा आधारित भएर संचालन हुर्नुपर्नेमा जोड दिँदै सामूहिक साकोस पनि त्यस मध्यकै एक भएको दाबी गर्नुभयो । कोरोना भाइरसको आर्थिक, सामाजिक तथा मनोबैज्ञानिक असरले संस्थाको वित्ती यव्यवस्थापनमा पनि प्रत्यक्ष प्रभाव पर्ने भएकोले त्यस प्रकारको चुनौती सामना गर्न अग्रिम तयारी आवश्यक भएकोमा जोड दिनुभयो । उहाँले एकीकरण गर्दा सबैजना भावनात्मक रुपमा पनि एक हुनुपर्नेमा जोड दिनुभयो ।
संस्थाका विभिन्न समिति उपसमिति, सल्लाहकार, कर्मचारी र कल्याण साकोसका संचालकहरुको उपस्थिति रहेको सो कार्यक्रकममा भौतिक दुरी कायम गरी जम्मा ६६ जनाको उपस्थिति रहेको संस्थाका व्यवस्थापक कविन्द्र धौबन्जारले जानकारी दिनुभयो ।