नवलपुर । जिल्लाको देवीचुली नगरपालिका १३, दलदलेस्थित परोपकार बचत तथा ऋण सहकारी संस्था लि. ले कर्मचारीहरुका लागि २ दिने उत्प्रेरणा तथा क्षमता विकास तालिम प्रदान गरेको छ । “हामी आफैं प्रशिक्षक, हामी आफैं प्रशिक्षार्थी” भन्ने मुल नाराका साथ परोपकार साकोसले कर्मचारी उत्प्रेरण तथा क्षमता विकास तालिम असोज २३ र २४ गते मध्य विन्दु नगरपालिकाको सितारा रिसोर्टमा तालिम सम्पन्न गरेको संस्थाका प्रमुख कार्यकारी अधिकृत जिवलाल तिवारीले साकोस आवाजलाई जानकारी गराउनुभयो । कोभिड १९ को महामारीका बीच पनि सहकारी संस्थामा कार्यरत कर्मचारीहरुलाई स्वउत्प्रेरणा विकास तथा सदस्य सेवामा थप शसक्त भएर लाग्न आवश्यक नवीन सोच र शैलीका बारेमा तालिममा जानकारी गराइएको प्रमुख कार्यकारी अधिकृत तिवारीले बताउनुभयो ।

संस्थाका ४ वटा सेवा केन्द्र र मुख्य कार्यालय गरी कुल २१ जना कर्मचारी सहभागी कार्यक्रमको संयोजन प्रमुख कार्यकारी अधिकृतले गर्नुभएको थियो । सहकारीको मुल मर्म “एकका लागि सबै र सबैका लागि एक” भनेझैं परोपकार साकोसका कर्मचारीहरु पनि एकका लागि सवै र सवैका लागि एक हौं, सवै कर्मचारी सवै काममा जानकार (मल्टिटास्किङ्) हुन पर्दछ जसले सम्पूर्ण कर्मचारीहरुमा एकता भाव सृजना गराउने उहाँले बताउनुभयो । त्यसैका लागि कार्यक्रम आयोजना गरिएको दाबी प्रमुख कार्यकारी अधिकृत तिवारीले बताउनुभयो ।  

नेफ्स्कूनको प्राविधिक सहयोगमा एशियाली ऋण महासंघ (आकू) ले विकसित गरेको वित्तीय सहकारीहरुको एशिया प्रशान्त क्षेत्रीय गुणस्तर सुनिश्चितता कार्यक्रम एक्सेस ब्रोन्ज ब्राण्ड प्राप्त गर्न सफल परोपकार साकोस लगातार ४ पटक नेफ्स्कूनकै राष्ट्रिय गुणस्तरता प्रमाणीकरण कार्यक्रम प्रोबेशन ब्राण्ड पनि प्राप्त गर्न सफल भएको छ । संस्था २०६३ साल पुस २६ गते स्थापना भएको हो ।