सुनसरी । नेफ्स्कूनको आयोजना एवम् अन्तर्राष्ट्रिय श्रम संगठनको नेपालस्थित कार्यालयको सहयोग एवं सामाजिक सुरक्षा कोषको प्राविधिक सहजिकरणमा आज प्रदेश नं १ स्तरीय “योगदानमा आधारित सामाजिक सुरक्षा कार्यक्रम” गोष्ठी कार्यक्रम भर्चुअल विधिबाट सम्पन्न भएको छ । १ सय ३० सहकारीकर्मीहरु सहभागी कार्यक्रममा नेफ्स्कूनकी संचालक गोमा नेपालले योगदानमा आधारित सामाजिक सुरक्षा कोष श्रमिकको हितमा रहेको र त्यसमा रहेका कतिपय व्यवस्थाहरु श्रमिकको हित अनुकूल भएकाले सम्पूर्ण साकोसहरु सूचिकरण भई योगदान प्रारम्भ गर्नुपर्ने बताउनुभयो । सामाजिक सुरक्षा कोषले विमा, उपदान, पेन्सन, लगायतका विषयमा कर्मचारीहरुको सक्रिय जीवनमा र तत्पश्चात समेत हितको सुरक्षण गरेको हुँदा सम्पूर्ण सहकारी संस्थाहरु यसमा सहभागी हुनुपर्ने बताउनुभयो ।

सामाजिक सुरक्षा कोषका उप–निर्देशक दिनेश कुमार कोइरालाले प्रस्तुतिकरणमा योगदानमा आधारित सामाजिक सुरक्षा कोषको अवधारणा र व्यवस्थाहरु बारे जानाकारी गराउनुका साथै सहभागीहरुको जिज्ञासा समाधान गर्नुभएको थियो । 
नेफ्स्कून संचालक गोमा नेपालले अध्यक्षता गर्नुभएको सो कार्यक्रममा नेफ्स्कुन संचालक घनश्याम अधिकारी, जिल्ला बचत संघ एवं साकोसका अध्यक्ष एवं प्रतिनिधिहरुले सहभागिता जनाउनुभएको थियो । कार्यक्रममा सामाजिक सुरक्षा कोषको तर्फबाट उपनिर्देशक कोइराला, सूचीकरण शाखा प्रमुख केदारनाथ ज्ञवाली र गोकुल थापाले सहजिकरण गर्नुभएको थियो । कार्यक्रम संचालन नेफ्स्कूनको सुनसरीस्थित फिल्ड कार्यालयका कार्यक्रम अधिकृत सन्दिपराज ढकालले गर्नुभएको थियो ।