दोलखा । हाम्रो जनकल्याण बचत तथा ऋण सहकारी संस्था लि. को आयोजनामा माध्यमिक विद्यालय स्तरीय लामो दुरीको दौड प्रतियोगिता आज सदरमुकाम चरिकोटमा सम्पन्न भएको छ । 

जिल्लामा एथ्लेटिक्स् खेलाडी उत्पादनमा सहयोग पुर्याउने उद्देश्यले संस्थाले विगत वर्षबाट कार्य क्षेत्रका माध्यमिक विद्यालयमा अध्ययन गर्ने छात्र र छात्रा सहभागी गराई लामो दुरीको दौड प्रतियोगिता आयोजना गर्न थालेको हो । आज भएको दौड प्रतियोगितामा कार्य क्षेत्र भित्रका १३ वटा विद्यालयका दुई दुई जना छात्र र छात्राले सहभागिता जनाएका थिए । छात्रा तर्फको दौडमा सुर्के माध्यमिक विद्यालय खरिढुंगाका प्रेमाडोल्मा प्रथम हुनुभएको थियो भने सुर्के माविकै छात्रा सुस्मिता श्रेष्ठ द्वितीय र महेन्द्रोदय माविका छात्रा बिमिसा केसीले तृतीय स्थान प्राप्त गर्नुभएको थियो । त्यसैगरी बिनिसा कार्की आँकुरा अंग्रेजी बोर्डिङ स्कुल, अप्सरा कार्की राइजिङ हिम्स एकेडेमी र सेमिका लामा हिमालय क्राउनले सान्त्वना स्थान प्राप्त गर्नुभएको थियो । 

छात्र तर्फको दौडमा माउन्टभ्याली एकेडेमीका बिशाल बस्नेत प्रथम, प्रज्वल गुरुङले द्वितीय स्थान  तथा भीम माध्यमिक विद्यालयका अन्जन कुमार नेपालीले तृतीय स्थान प्राप्त गर्नुभएको थियो । दौड प्रतियोगितामा प्रथम, द्वितीय, तृतीय र राइजिङ हिम्स एकेडेमीका कपिल थामी, आँकुरा अंग्रेजी बोर्डिङ स्कुलका रोशन श्रेष्ठ र सुर्के माध्यमिक विद्यालयका ल्हानम शेर्पाले सान्त्वना स्थान प्राप्त गर्नुभएको थियो । सहभागिले नगद पुरस्कार छ हजार, चार हजार, दुई हजार र पन्ध्र सय, प्रमाण पत्र र मेडल वितरण गरिएको थियो ।

छात्र तर्फ २५ जना र छात्रातर्फ २३ जनाले सहभागिता जनाएको दौड प्रतियोगिताका विजेताहरुलाई भीमेश्वर नगरपालिका उपमेयर कमला बस्नेत, नेफ्स्कूनका सञ्चालक जिवसराज खडका र जिल्ला सहकारी संघ दोलखाका अध्यक्ष हेमन्त चौलागाईले संयुक्त रुपमा पुरस्कार वितरण गर्नुभएको थियो ।  संस्थाका उपाध्यक्ष कमल प्रसाद चौलागाई अध्यक्षतामा भएको दौड प्रतियोगितामा उत्कृट हुने विद्यालयलाई शिल्ड तथा प्रमाण पत्र र सहभागी सबै विद्यार्थीलाई मेडल तथा प्रमाण पत्र वितरण गरिएको प्रमुख कार्यकारी अधिकृत दिपक बस्नेतले जानकारी गराउनु भयो । कार्यक्रमा संस्थाका पदाधिकारी, सञ्चालक, सल्लाहाकार, उपसमिति सदस्य, शेयर सदस्य लगायत कर्मचारीहरुको उपस्थिति रहेको थियो ।