एजेन्सी । विश्व सहकारी अभियानको सबैभन्दा महत्वपूर्ण दिन अन्तर्राष्ट्रिय सहकारी दिवसको यस वर्षको थिम ‘Rebuild Better Together' (रिबिल्डि बेटर टुगेदर) तय गरिएको छ । विश्व सहकारी अभियानको सर्वोच्च निकाय अन्तर्राष्ट्रिय सहकारी महासंघ (आइसीए) ले सन् २०२१ को अन्तर्राष्ट्रिय सहकारी दिवस (कोपप्स् डे) को थिम तय भएको जनाएको हो । विश्वभर प्रत्येक जुलाई महिनाको पहिलो शनिवार मनाईने कोपप्स् डे को यस वर्षको थिम ‘रिबिल्डि बेटर टुगेदर’ (एकजुट भई राम्रो पुननिर्माणमा जुटौं) तय गरिएको हो । नेपाली क्यालेन्डर अनुसार यो वर्ष अन्तर्राष्ट्रिय सहकारी दिवस असार १९ गते (जुलाई ३, २०२१) मा परेको छ भने गत वर्ष असार १९ (४ जुलाई, २०२०) मा परेको थियो । गत वर्षको अन्तर्राष्ट्रिय सहकारी दिवसको थिम  ‘Coops For Climate Action' जलवायु कार्यका लागि सहकारी’ तय गरिएको थियो ।

विश्व सहकारी अभियानले सन् १९२३ देखि कोपप्स् डे मनाउँदै आएको छ भने सन् १९९५ देखि अन्तर्राष्ट्रिय सहकारी महासंघ र संयुक्त राष्ट्र संघले संयुक्त रुपमा आइसीए डे को थिम तय गर्दै आएका छन् । यसरी हेर्दा यो वर्ष ९९ औं अन्तर्राष्ट्रिय सहकारी दिवस तथा २७ औं राष्ट्र संघीय अन्तर्राष्ट्रिय सहकारी दिवस हो । सन् १९९२ मा आइसीए सदस्यहरु र सहकारी प्रवर्धन तथा विकास समिति (कोप्याक) सदस्यहरुको संयुक्त पहलका कारण संयुक्त राष्ट्र संघीय महासभाले सन् १९९५ को जुलाई महिनाको प्रथम शनिवारलाई आइसीए स्थापनाको १ सय वर्ष पूरा भएको दिनलाई अन्तर्राष्ट्रिय सहकारी दिवसका रुपमा मनाउने घोषणा गरेको थियो ।

विश्वभरका सहकारीहरुले विश्वव्याधी कोभिड १९ को एकजुट भएर कसरी सामना गरिरहेका छन् भन्ने विषयमा आफ्नो गतिविधिहरु केन्द्रित गर्ने अन्तर्राष्ट्रिय सहकारी महासंघ (आइसीए) ले जनाएको छ । आइसीएका अध्यक्ष एरियल ग्वार्कोले विश्वभरका सहकारी र आइसीएका रणनीतिक साझेदारहरुलाई कोपप्स डे को तयारीका लागि आग्रह गर्दै सहकारीहरुले कसरी ऐकताबद्ध भएर पुनर्निर्माण गर्न सक्छन् भन्ने उदाहरण प्रस्तुत गर्न आग्रह गर्नुभएको छ । आइसीले यस वर्षको कोपप्स डे सम्बन्धी लोगो, मुख्य सन्देश तथा डिजिटल सामाग्रीहरु चाँडै उपलब्ध हुने जनाएको छ ।