काठमाडौं । एसियाली ऋण महासंघ (आकू) स्थापनाको आज ५० औं वर्ष पुगेको छ । आकूले स्वर्ण महोत्सव आज भर्चुअल रुपमा कार्यक्रम गरी मनाएको छ । उक्त अभौतिक कार्यक्रममा आकूका संस्थापक अध्यक्ष एन्ड्रियु सो, वर्तमान अध्यक्ष किम योनसिक, विश्व ऋण परिषद्का प्रमुख कार्यकारी अधिकृत ब्रायन ब्राञ्च, नेफ्स्कूनका अध्यक्ष परितोष पौड्याल, कामु प्रमुख कार्यकारी अधिकृत प्रकाश प्रसाद पोखरेललगायत ४० भन्दा बढी मुलुकका आकू आबद्ध सदस्य संस्थाका अध्यक्ष एवम् प्रमुख कार्यकारी अधिकृतले भिडियो रेकर्ड गरिएको शुभकामना व्यक्त गर्नुभएको थियो । कार्यक्रममा नेफ्स्कून पदाधिकारीका साथै विभागीय प्रमुखहरुको पनि सहभागिता थियो । नेफ्स्कूनका पूर्व अध्यक्ष ऋषिराज घिमिरे विगतमा आकूको अध्यक्ष हुनुभएको थियो भने अर्का निर्वतमान अध्यक्ष मिनराज कडेल आकूको प्रथम उपाध्यक्ष निर्वाचित हुनुभएको थियो ।
सन् १९७१ मा आज अर्थात् अप्रिल २८ मा जापान, हङकङ, दक्षिण कोरिया, मलेसिया, फिलिपिन्स, इन्डोनेसिया, ताइवान, थाइल्याण्ड र तत्कालीन दक्षिणी भियतनामका बचत तथा ऋण सहकारीकर्मीहरुको सियोलमा सम्पन्न भेलाले आकू स्थापना गरेको थियो ।