काठमाडौं । नेपाल बचत तथा ऋण केन्द्रीय सहकारी संघ लि.का अध्यक्ष परितोष पौड्यालले सहकारी क्षेत्रका लागि कोभिड विरुद्धको खोपको प्रबन्धको प्रयास भैरहेको बताउनुभएको छ । सहकारी क्षेत्रबाट कोभिड विरुद्धको खोपका लागि यथाशिघ्र आवश्यक पहल गर्नुपर्ने आवाज उठिरहेको समयमा बचत तथा ऋण सहकारीहरुको एक मात्र केन्द्रीय छाता संघ नेफ्स्कूनले औपचारिक अनौपचारिक पहलहरु भैरहेको जनाएको हो । ‘स्वास्थ्य सचिव लक्ष्मण अर्यालसँग औपचारिक कुराकानी भएको छ,’ अध्यक्ष पौड्यालले भन्नुभयो, ‘सचिवज्यूले सकारात्मक संकेत दिनुभएको छ । नेफ्स्कूनले खोपको लागि सहजीकरण गरिदिन मन्त्रालयमा पत्र समेत दर्ता गरिसकेको छ ।’

‘सम्भवतः एक दुई दिनमै हाम्रो माग सम्बोधन हुन्छ भन्ने विश्वास छ,‘ अध्यक्ष पौड्यालले भन्नुभयो, ‘यसबीच खोपका लागि हामी निरन्तर लागिपरेका छौं ।’ नेफ्स्कूनले समग्र सहकारी क्षेत्रको दुई तिहाई क्षेत्र समेटेको बचत तथा ऋण सहकारी संघ संस्थाहरुमा कार्यरत जनशक्तिका लागि कोरोना विरुद्धको खोपको सहज उपलब्धताका लागि पहल अघि बढाएको हो ।

संघका कामु प्रमुख कार्यकारी अधिकृत प्रकाश प्रसाद पोखरेलले पनि सहकारी मन्त्रालय, विभाग, स्वास्थ्य मन्त्रालय लगायत सम्बद्ध निकायसँग सहकारी अभियानका लागि खोपको प्रबन्ध गर्न निरन्तर प्रयास भैरहेको बताउनुभयो ।