कक्षा ६ मा अध्ययनरत एक छात्र सिइओसँग प्रश्न गर्छन्, क्रेडिट युनियन विनाको संसार कस्तो हुन्थ्यो होला ?

अमेरिकी बचत तथा ऋण सहकारीहरुको छाता निकाय क्युना म्युचुअल ग्रुपका प्रमुख कार्यकारी अधिकृत (सीइओ) र कक्षा ६ मा अध्ययनरत एक छात्रबीच हालै रोचक प्रश्नोत्तर कार्यक्रम भएको छ । क्युना म्युचुअल ग्रुपका सिईओ बब ट्रञ्जो र जेम्स राईस भर्चुअल वार्तालापमा आमनेसामने भएका थिए । उक्त कार्यक्रममा क्रेडिट युनियन, सिइओ जिम्मेवारीदेखि जुस र आइसक्रिमसम्मका रमाइला वार्तालापहरु भएका छन् । 
‘वी आर द वल्ड’ नाम दिइएको उक्त कार्यक्रमको आयोजना सहकारीमा बालबालिका तथा युवा सहभागिता वृद्धिको प्रयास स्वरुप गरिएको हो । 

सिईओ बब ट्रञ्जो र जेम्स राईसबीचको सम्वाद यहाँ प्रस्तुत गरिएको छः

राईसः तपाई मेरो उमेरको हुँदा ठूलो भएपछि के बन्ने रहर थियो ?

ट्रञ्जोः म फुटबल खेलाडी बन्न चाहन्थेँ । स्कूलमा छदाँ म फुटबल खेल्थेँ तर कलेजमा प्रतियोगिताहरुमा खेल्नका लागि योग्य कुशल खेलाडी थिइनँ । मैले युनिभर्सिटी अफ केन्टुकीमा अध्ययन गरेँ र त्यसपछि कानुन स्कूलमा पनि पढेँ ।

राईसः तपाईलाई पिताले सुनाउने कुनै राम्रो चुट्किला (‘ड्याड जोक’) याद छ ?

ट्रञ्जोः अह छैन । म ठूलो सिईओ हुँला, मसँग धरै ठूलो सहकारीको व्यवस्थापन प्रमुखको रुपमा काम गर्ने गहन अभिभारा होला तर घरमा म सबैभन्दा निरीह छु ।

ट्रञ्जोः यदि तिमी एक दिनका लागि सिईओ बन्यौ भने सबैलाई के काम गराउँछौं ?

राईसः म कर्मचारीहरुलाई त्यो दिन भित्र निश्चित लक्ष्य पूरा गर्न लगाउँथेँ अन्यथा दण्डित गर्थेँ । कर्मचारीहरु सधै खुसी रहुन् भन्नका लागि उनीहरुलाई सन्तान र परिवारका सदस्यबाट न्यायो आलिङ्गन तथा माया पाउने वातावरण सृजनामा सहयोग गर्थेँ । म कर्मचारीहरुलाई आइसक्रिम र जुस पनि उपलब्ध गराउँथेँ ।

ट्रञ्जोः ती दुवै चीज अब हाम्रो क्यान्टिनमा पनि ब्यवस्था गर्नेछौं ।

राईसः सीईओ हुनुको सबैभन्दा मनपर्ने पक्ष के हो ?

ट्रञ्जोः सहकारीमा ३८०० कर्मचारीको नेतृत्व गर्नु, सहकारीका सदस्यहरुलाई वित्तीय सुरक्षाको प्रत्याभूतिमा सहयोग गर्नु र हाम्रो क्रेडिट युनियनले सदस्य क्रेडिट युनियनहरुमा पारेको सकारात्मक प्रभाव बारे जानकारी लिन पाउनु सबैभन्दा मनपर्ने विषय हुन् । यी कुराहरुले मलाई धेरै नै आनन्दित तुल्याउँछ । हामीले विकसित गरी  उपलब्ध गराएका वस्तु, सेवा तथा समाधानका उपायहरुले सदस्यहरुको जीवनमा पारेको प्रभावले खुसी तुल्याउँछ । हाम्रो देशमा क्रेडिट युनियनहरुले तिमी, तिम्रो मातापिता, तिम्रो हजुरबुबा हजुरआमाहरुका लागि राम्रो काम गरेका छन् ।

राईसः संसार अझै राम्रो हुन्थ्यो, यदि ?

ट्रञ्जोः यदि सबैसँग वित्तीय स्रोत साधन हुँदो हो त, सबैजना खुसी हुन्थे । त्यस्तै, यदि सबैजनाले एक अर्काप्रति दयामाया भाव व्यक्त गर्ने हो भने पनि संसार अझै राम्रो हुन्थ्यो । अर्को कुरा, हिजोआज हाम्रा युवाहरुमा एकदमै दबाब र तनाव छ । म युवाहरु रमाइलो गरुन् भन्ने चाहन्छु । त्यसका लागि राईस तिमी र तिम्रा साथीहरुले निक्कै मिहेनत गर्नुपर्छ र सँगै केही रमाइलो पनि गर्नुपर्छ ।

राईसः क्रेडिट युनियन विनाको संसार कस्तो हुन्थ्यो होला ? 

ट्रञ्जोः संसार अध्यारो र दुःखी हुन्थ्यो । हाम्रो आर्थिक प्रणालीमा क्रेडिट युनियनहरुको एकदमै महत्वपूर्ण भूमिका छ । क्रेडिट युनियनहरुले उत्कृष्ट सदस्य सेवा प्रदान गरेका छन् । उनीहरुले दुःख गरेर सदस्यहरुको रकम सुरक्षित गर्ने, त्यसवापत थुप्रै सेवाहरु प्रदान गर्ने काम गरेका छन् । मलाई लाग्छ, क्रेडिट युनियहरु आफ्नो गुणस्तरीय तथा विश्वसनीय काम र सेवाभावका कारण पछिल्लो समयमा निक्कै लोकप्रिय बनेका छन् ।

ट्रञ्जोः क्रेडिट युनियनका सम्बन्धमा तिम्रो धारणा के छ ?

राईसः क्रेडिट युनियनहरु ‘कुल’ छन् । किनभने मैले चिनेजानेका सबै ‘कुल’ व्यक्तिहरु क्रेडिट युनियनमा काम गर्छन् । 

ट्रञ्जोः सबभन्दा ठूलो कुरा के हो भने तिम्रो हजुरबुबा र अरु जसजसले क्रेडिट युनियनको सञ्चालकको रुपमा काम गर्नुभयो उहाँहरु सबैले स्वयंसेवी रुपमा योगदान गर्नुभयो । उहाँहरुले क्रेडिट युनियनलाई सुरक्षित र भरपर्दो बनाउन आफ्नो समय र शक्ति खर्चिनुभयो ।

ट्रञ्जोः क्रेडिट युनियनहरु तिमीहरु जस्तो उमेर समूहका लागि सेवा गर्न तयार छ भन्नलाई के गर्नुपर्छ ?

राईसः मलाई लाग्छ, क्रेडिट युनियनहरुले फरक खालको कार्यक्रमहरु ल्याउनुपर्छ । मेरो हजुरबुबासँग महिलाहरुलाई सहयोग गर्ने फरक प्रकृतिको कार्यक्रम थियो । मलाई लाग्छ, आज क्रेडिट युनियनहरुसँग युवा लक्षित स्पष्ट कार्यक्रम हुनुपर्छ ।

ट्रञ्जोः मलाई लाग्छ तिमी जस्ता युवाहरु मोबाइलमा गेम खेल्न खप्पिस छौं । त्यसैले हामीले तिमीहरुको मोबाइल, आइफोन, आइप्याडबाट सबै सेवा सुविधा लिनसक्ने गरी प्रविधि विकास गर्नुपर्छ । हामी त्यो काम गरिरहेका छौं । यसैगरी, हामीले तिमीहरुलाई वित्तीय साक्षरता शिक्षा दिनुपर्छ जसले गर्दा जब तिमी तयार हुन्छौं तब तिम्रो वृद्ध बुबाआमालाई हेरविचार गर्न सक्छौं । मलाई लाग्छ अब क्रेडिट युनियनहरु तिमी र तिम्रा साथीहरुका लागि तयार हुनुपर्छ ।

राईसः तपाई मेरा लागि तयार हुनुहुन्छ ?
ट्रञ्जोः हामी तिम्रो लागि तयार हुनैपर्छ । हामीसँग अर्को विकल्प नै छैन ।