काठमाडौं । नेफ्स्कूनका कार्यबाहक अध्यक्ष चन्द्र प्रसाद ढकालले संघको निरन्तर अनुगमन र सुपरिवेक्षण रहने स्तरीकरण तथा गुणस्तर सुनिश्चितताका कार्यक्रममा आबद्ध सदस्य साकोसहरुको सम्पूर्ण जिम्मा संघले लिने बताउनुभएको छ । ५ औं कार्यकुशलता तथा सिकाई व्यवस्थापन कार्यशाला अन्तर्गत आज दिव्येश्वरी साकोस लौहकन्थलीको आयोजनामा भएको कार्यशालाका प्रमुख अतिथि ढकालले नेफ्स्कूनको ‘स्कुलिङ’ भित्र बसेका सदस्य संघ संस्थाहरुको जिम्मा संघले लिने बताउनुभएको हो । 

दिव्येश्वरी साकोसका अध्यक्षत प्रदीप शर्माको अध्यक्षतामा भएको उक्त कार्यशालामा नेफ्स्कूनका प्रबक्ता समेत रहनुभएका कार्यबाहक अध्यक्ष ढकालले बचत ऋण सहकारीहरुका लागि छुट्टै साकोस ऐनको आवश्यकता झन टड्कारो बन्दै गएकोले त्यसका लागि बहसपैरवीमा संघ निरन्तर लागिपरेको समेत बताउनुभयो । त्यस्तै, सहकारी ऐन २०७४ र नियमावली २०७५ मा व्यवस्था गरिएको बचत तथा ऋण सहकारीहरुको लागि स्थिरीकरण कोष, साकोस अभियानको जगेडा कोष भएको उल्लेख गर्दै उहाँले कोषमा योगदानका लागि सबैसँग आग्रह गर्नुभयो ।कार्यक्रममा १५ वटा साकोसका प्रतिनिधिहरुको सहभागिता रहेको नेफ्स्कून भक्तपुर फिल्ड कार्यालय इन्चार्ज पेशल कुमार खड्काले जानकारी गराउनुभयो ।