कास्की । पोखरा ८ सृजनाचोकस्थित शुभकामना बचत तथा ऋण सहकारी संस्था लि. प्रोबेसन कार्यक्रममा आबद्ध भएको छ । संस्थालाई नीति, विधि र प्रविधि अनुरुप थप व्यावसायिक र सुशासित बनाउन छाता संघ नेफ्स्कूनले सञ्चालन गरेको साकोसहरुको स्तरीकरणसम्बन्धी पूर्ण तथा व्यावासायिक साकोस विकास कार्यक्रम प्रोबेसनमा आबद्ध भएको संस्थाका व्यवस्थापक अशोक बस्नेतले जानकारी गराउनुभयो । 

आज साकोसको कार्यालयमा प्रोबेसन सम्झौतामा हस्ताक्षर तथा आदानप्रदान गरिएको थियो । उक्त संक्षिप्त कार्यक्रममा नेफ्स्कूनकोतर्फबाट पोखरा फिल्ड कार्यालय इन्चार्ज यमकला सुवेदी, कार्यक्रम अधिकृत सूर्य प्रसाद तिमल्सिना, बरिष्ठ सहायक दिप्ती आचार्य सहभागी हुनुहुन्थ्यो भने शुभकामना साकोसकोतर्फबाट अध्यक्ष गोकर्ण बरुवाल र व्यवस्थापक अशोस बस्नेत सहभागी हुनुहुन्थ्यो । 

२०६६ सालमा स्थापित शुभकामना साकोसमा हाल ५ सय ५३ सदस्य, करिब ४ करोड ४० लाख सेयर पुँजी, ११ करोड बचत, ११ करोड ऋण लगानी रहेको छ । ४ जना कर्मचारी रहेको उक्त साकोसले मुख्य कार्यालय सृजनाचोकमार्फत मात्रै सदस्य सेवा प्रदान गर्दै आइरहेको छ । व्यवस्थापक बस्नेतले भन्नुभयो, “कार्यक्रम आबद्धता पश्चात तालिम, शिक्षाको माध्यमबाट संस्थागत सुधारमा द्रुत गतिमा लाग्ने विश्वास लिएका छौं ।”