काठमाडौं । सहकारी विभागका रजिस्ट्रार झलकराम अधिकारीले सहकारीको नियमन गर्ने अधिकार सरकारको भएको बताउँदै अभियानसँग मिलेर अनुगमन र निरीक्षण गर्न विभाग तयार रहेको बताउनुभएको छ । उहाँले नियामक निकाय कमजोर बनाएर सहकारी अभियान अघि बढ्न नसक्ने समेत स्पष्ट पार्नुभयो । राज्यले जारी गरेको ऐन, नियम, निर्देशिका पालन गर्ने दायित्व सहकारीहरुको भएको र पूर्ण रुपमा तिनको कार्यान्वयनमा आवश्यक सहयोगको लागि आग्रह समेत गर्नुभयो ।

चौथो ललितपुर साकोस समिट २०७८को उद्घाटन समारोहमा आज शुभकामना मन्तव्य राख्दै रजिस्ट्रार अधिकारीले सहकारीको ब्याजदर सहकारीकर्मीको भावना सम्मान हुने गरी तय गरिने जानकारी पनि गराउनुभयो । सन्दर्भ ब्याजदर निर्धारण समितिको आजको बैठकमा ब्याजदर पुनरावलोकनको तयारी भैरहेको सन्दर्भमा उहाँले उक्त जानकारी गराउनुभएको हो ।  यसैगरी, उहाँले सहकारीको भिजन पेपर तयारीको बारेमा जानकारी गराउँदै त्यसमा अभियानको पनि पृष्ठपोषण आवश्यक रहने बताउनुभयो । सरकार र अभियान हातेमालो गरेर अघि बढ्नुपर्नेमा रजिस्ट्रार अधिकारीको जोड थियो ।