काठमाडौं । नेपाल राष्ट्र बैंकले चालु आर्थिक वर्षको मौद्रिक नीतिको पहिलो त्रैमासाको समीक्षा प्रतिवेदन आज सार्वजनिक गरेको छ । उक्त प्रतिवेदनमा सहकारीलाई प्रविधिसँग जोड्ने विषय समोवेश गरिएको छ । राष्ट्र बैंकले सहकारी र लघुवित्तलाई प्रविधि सेवा उपयोग गर्ने नीति दिएको हो । यसका कारण अब सहकारीलाई प्रविधिमा जोडिन सहज हुने भएको छ । सहकारी क्षेत्रले प्रविधिकरणमा जान कानुनी तथा नीतिगत अहसजता भएको विषयलाई प्राथमिकताका साथ सरोकारवालाहरुसँगको बहसपैरवीको विषय बनाउँदै आएको छ । खासगरी कोभिड १९ पश्चात उत्पन्न असहजतालाई ध्यानमा राखी सहकारी क्षेत्रले पनि प्रविधिकरणको आवश्यकता बढी नै बोध गरेको अवस्थामा मौद्रिक नीतिको समिक्षामा यो विषय प्रवेश भएको हो ।

राष्ट्र बैंकले आफ्नो क्षेत्राधिकार नभएको भन्दै सहकारीलाई वेवास्ता गर्दै आएपनि प्रविधिमा जोड्ने विषय पहिलो त्रैमासा समीक्षा प्रतिवेदनमा उल्लेख छ । सहकारीलाई प्रविधिमा जोड्न सकिए नियमन गर्न पनि सघाउ पुग्ने नियामक निकाय सहकारी विभागले बताउँदै आएको छ । सहकारी अभियानको उपल्लो निकाय राष्ट्रिय सहकारी महासंघले समेत सहकारीलाई प्रविधिमा जोड्न मार्गनिर्देशन तयारी गरिरहको छ । 
स्पष्ट कानुन अभाव र सदस्यहरुमा प्रविधि पहुँचको अभाव कारण सहकारीमा प्रविधि प्रयोग प्रयोग अगाडि बढ्न नसकेको अवस्था छ ।