कास्की । ग्रामीण बचत तथा ऋण सहकारी संस्था लि. सल्यानका संचालकहरुको क्षमता अभिवृद्धि तालिम- CUDCC पोखरामा सम्पन्न भएको छ । नेफ्स्कूनको प्राविधिक सहयोगमा यही पुस ५ देखि ८ गतेसम्म सञ्चालित तालिममा साकोसको संचालक समिति, लेखा सुपरिवेक्षण समिति, उपसमिति र उच्च व्यवस्थापन गरी १८ जनाको सहभागिता थियो । तालिमको समापन कार्यक्रमका प्रमुख अतिथि गण्डकी प्रदेशका भूमि व्यवस्था, कृषि सहकारी तथा गरिबी निवारण मन्त्री चन्द्र बहादुर बुढा रहनुभएको थियो भने उद्घाटन साकोसका अध्यक्ष धिरेन्द्र कुमार शाक्यले गर्नुभएको थियो । तालिम सहजीकरण नेफ्स्कूनका तालिम विभाग प्रमुख गणेश प्रसाद तिमिल्सेना र कार्यक्रम अधिकृत कोमल राज अधिकारीले गर्नुभएको थियो ।

समापन कार्यक्रममा बोल्दै प्रमुख अतिथि मन्त्री बुढाले हाल केही सहज भएको बताउँदै कोभिडका कारण उत्पन्न समस्या र चुनौती सामना गरी सहकारीहरुले सदस्यहरुलाई सेवा प्रवाह गरेको भन्दै प्रशंसा गर्नुभयो । संविधानमा अर्थतन्त्रको महत्वपूर्ण स्तम्भको रुपमा सहकारी उल्लेख भए बमोजिम तिनै तहको सरकारहरुले यसलाई व्यबस्थित गर्न महत्व दिएको उहाँको भनाई थियो । मन्त्री बुढाले सहकारीले समाजिक उत्तरदायित्व बहन गर्नुपर्ने भन्दै विपन्न वर्गहरुको हितमा सहकारीहरुले कार्य गर्नुपर्नेमा जोड दिनुभयो । उहाँले सदस्यहरुलाई व्यावसायिकता र उद्यमसँग जोडदै रोजगारी वृद्धि गर्न सहकारी क्षेत्रसँग आग्रह गर्नुभयो । संस्थाले सदस्यहरुको अपन्त्व हुनेगरी कार्यक्रमहरु ल्याउनुपर्ने भन्दै मन्त्री बुढाले तालिममा सिकेको सिप र ज्ञानलाई व्यवहारमा कार्यान्वयन गरी नतिजामुखी बनाउन सहभागीहरुसँग अनुरोध गर्नुभयो । 

साकोसका अध्यक्ष शाक्यले तालिममा सिकेको सीप र ज्ञानलाई व्यवहारमा कार्यान्वयन गरी संस्थागत सुशासन कायम गर्दै सदस्यमैत्री सेवामार्फत संस्थालाई वित्तीय रुपमा सुरक्षित र दिगो बनाउने अभियानमा लाग्ने प्रतिबद्धता व्यक्त गर्नुभयो ।