प्रदेश नं १ को सुनसरीमा कर्ब्स कार्यक्रमप्रतिको आकर्षण बढ्दो छ । नेफ्स्कूनले साकोसहरुको गुणस्तर प्रमाणीकरणका लागि सञ्चालन गर्दै आएका एक्सेस्, प्रोबेसनसँगै जोखिममा आधारित साकोस सुपरिवेक्षण कार्यक्रम-कर्ब्समा पनि जिल्लाका साकोसहरुको आकर्षण बढेको हो । नेफ्स्कून जिल्ला संघ साझेदारी कार्यक्रम अनुरुप कर्ब्स कार्यक्रम जिल्ला संघमार्फत सञ्चालन हुँदै आएको छ । आज एकै दिन जिल्लाका ३ साकोसहरु जोखिममा आधारित साकोस सुपरिवेक्षण कार्यक्रम-कर्ब्समा आबद्ध भएका हुन् । जिल्ला बचत संघ सुनसरीका अध्यक्ष शिवराज श्रेष्ठ र बरिष्ठ उपाध्यक्ष योगमाया सुवेदीको उपस्थितिमा बचत संघमा आयोजित कार्यक्रममा तीनवटै साकोसहरुसँग सम्झौतामा हस्ताक्षर भएको हो । तीनवटै संस्था जिल्ला संघका सञ्चालक तथा लेखा सुपरिवेक्षण समितिका अधिकारीहरुको प्रारम्भिक साकोस हुन् ।

जिल्ला संघ सुनसरीका सचिव प्रल्हाद दाहालको इटहरी १ स्थित प्रारम्भिक संस्था स्वरोजगार साकोस, लेखा सुपरिवेक्षण समिति संयोजक फणिन्द्र प्रसाद दाहालको इनरुवा ३ स्थित सखुवागाँछी साकोस र सञ्चालक सदस्य अफिसर सुयलको धरानस्थित शिखर साकोस आज कर्ब्स कार्यक्रममा सहभागी भएका हुन् । बचत संघको इटहरीस्थित कार्यालयमा आयोजित कार्यक्रममा नेफ्स्कूनका कार्यक्रम अधिकृत मुकेश दाहाल, बचत संघका कार्यक्रम अधिकृत सुमन सुवेदी, बचत संघकी व्यवस्थापक मिना नेपाल लगायतको उपस्थिति थियो ।

नेफ्स्कून जिल्ला संघ साभेदारीमा सञ्चालित कर्ब्स कार्यक्रमले साकोसहकरुको वित्तीय तथा गैर वित्तीय जोखिमहरुको बैज्ञानिक र व्यवस्थित बिश्लेषण मात्र होइन तिनको समाधानको वस्तुनिष्ठ उपायहरु समेत सुझाउँदछ । वित्तीय कारोबार गर्ने साकोसहरुमा आइपर्ने विभिन्न जोखिमबारे सचेत भई समयमै निदानात्मक उपचार अवलम्बन गर्न पनि कर्ब्स कार्यक्रम सहयोगी बन्दै आएको छ । कोभिड, तरलता चाप लगायत विभिन्न जोखिमहरुलाई ध्यानमा राखी जिल्लाका साकोसहरु नेफ्स्कूनले विकास गरेको गुणस्तर सुनिश्चितताका कार्यक्रमहरुमा जिल्ला बचत संघमार्फत सहभागिता जनाउन उत्साहित भएको नेफ्स्कूनका कार्यक्रम अधिकृत मुकेश दाहालले जानकारी गराउनुभयो । सम्झौता कार्यक्रम अघि कार्यक्रमा बारेमा छलफल हुनुका साथै नेफ्स्कूनका कार्यक्रम अधिकृत दाहालले कर्ब्स कार्यक्रमसम्बन्धी अभिमुखीकरण समेत गर्नुभएको थियो ।