भक्तपुर जिल्ला बचत तथा ऋण सहकारी संघ लि.को महिला सशक्तिकरण उपसमितिको आयोजना र नेफ्स्कूनको प्राविधिक सहयोगमा सिद्धि गणेश तालिम खंचा, भक्तपुरमा दुई दिवसिय वित्तीय परामर्श तालिम फागुन १४ गते सम्पन्न भएको छ । 

बचत संघका अध्यक्ष कृष्ण गोविन्द लाखाजुले वित्तीय परामर्श तालिम वृहत विषय भएकोले यसमा निरन्तर अद्यावधिक हुनुपर्ने विचार राख्नुभयो । सहकारीमा सन्दर्भ व्याजदर हचुवामा तोक्न नमिल्ने भन्दै तथ्यांकका आधारमा तोक्नुपर्नेमा जोड दिदैं उहाँले हाल वित्तीय बजार बढ्दो व्याजदरलाई ध्यानमा राखी सन्दर्भ व्याजदर १६ प्रतिशत निर्धारण गर्नु ठिक रहेको बताउनुभयो । उहाँले कानुन विपरित सञ्चालित बहुउद्देश्यीय सहकारीहरु सञ्चालनमा रोक लगाउनुपर्ने, एक व्यक्ति एक सहकारीको व्यवस्था संशोधन हुनुपर्ने र मालपोतमा ३० लाखसम्मको रोक्का दस्तुर रु.५००। बाट रु.८०००। सम्म बृद्धि गरेकोमा विरोध जनाउदैं सोको संशोधनका लागि वागमती प्रदेश सरकार समक्ष संघले ज्ञापन पत्र बुझाउने तयारीमा रहेको बताउनुभयो ।

संघका संचालक एंव उपसमितिका संयोजक कृष्णश्वरी प्रजापतिले वितीय क्षेत्रमा वित्तीय परामर्शको महत्व बताउदैं तालिमबाट सिकेका कुराहरु व्यक्तिगत जिवनमा व्यहारमा उतार्न र संस्थाका सदस्यहरुलाई निरन्तर वित्तीय परामर्श दिनुपर्ने विचार राख्नुभयो । उपसमितिका सदस्य निर्जला ढुंगेलले स्वागत मन्तव्य राख्दै संस्थामा वित्तीय परामर्शका कार्यलाई प्रभावकारी बनाउने उद्देश्यले संघले वित्तीय परामर्श तालिममो आयोजाना गरेको वताउनुभयो ।

तालिमको सहजीकरण नेफ्स्कूनका बरिष्ठ अधिकृत नविनराज दाहालले गर्नुभएको थियो । तालिमको समापन समारोह सञ्चालन गर्दै संघका व्यवस्थापक बालकृष्ण धोजुले संस्थामा वित्तीय परामर्श कक्ष स्थापना गरी वित्तीय साक्षरताको अभियान नै सञ्चालन गर्नुपर्ने आवश्यकता औंल्याउनुभयो । यसले सहकारीमा सहकारीताको विकासमा मद्दत पुग्नुको साथै सदस्यको आर्थिक विकासमा उल्लेख्य योगदान पुग्ने विचार राख्नुभयो । 

तालिमका सहभागीहरुले तालिम अरु तालिम भन्दा फरक र व्यवहारिक रहेकोमा खुशी व्यक्त गर्दे तालिमबाट बचत बृद्धिका उपाय, ऋण परिचालन, परिवारिक बजेट, वित्तीय परामर्श गराउने उपायहरु लगायत ज्ञान आर्जन गरेको बताउनुभयो । तालिममा संस्थाका शिक्षा उपसमितिका संयोजक र कर्मचारी गरी ३७ जनाको सहभागिता रह्यो ।