सुनसरी । ‘साकोस व्यवस्थापक गोष्ठी –२०७८’ सुनसरीको इटहरीमा आज सम्पन्न  भएको छ । बचत तथा ऋण सहकारी संघ लि., सुनसरी को आयोजना, राष्ट्रिय सहकारी महासंघ, नेफ्स्कून र राष्ट्रिय सहकारी बैंकको प्राविधिक सहयोगमा सञ्चालित दुईदिने गोष्ठीले साकोस सुदृढीकरणका लागि दीर्घकालिन रणनीतिक मार्गचित्र तय गर्ने विश्वास सहभागीहरुले लिएका छन् ।

प्रदेश नं. १ का भूमि व्यवस्था, सहकारी तथा गरिबी निवारण मन्त्री ओमप्रकास सरावगीले हिजो उद्घाटन गर्नुभएको गोष्ठी राष्ट्रिय सहकारी महासंघकी सञ्चालक एवम् सुनसरी बचत संघकी उपाध्यक्ष अमृता सुब्बाको प्रमुख आतिथ्यतामा आज सम्पन्न भएको हो । 

विशिष्ट अतिथि, अतिथि एवम् स्थानीय साकोस प्रतिनिधिहरु सम्मिलित गोष्ठीमा ५६ बचत तथा ऋण सहकारी संस्थाका व्यवस्थापकहरुको सहभागिता रहेको थियो । दुई दिने गोष्ठीमा सहकारी अभियानका समसामयिक विषय, विद्यमान तरलता संकट, साकोसको प्रभावकारी सञ्चालनका लागि सञ्चालक व्यवस्थापक बीचको सम्बन्ध, सहकारीमा आयकर सम्बन्धी कानुनी व्यवस्थाहरुको विषयमा विस्तृत अन्तरक्रिया भएको थियो । 

गोष्ठीको पहिलो दिन नेफ्स्कूनका निवर्तमान कोषाध्यक्ष केशव पोख्रेलले वित्तीय संकट र तरलता व्यवस्थाप र राष्ट्रिय सहकारी महासंघका सञ्चार अधिकृत राम सुदन तिमिल्सिनाले सञ्चालक र व्यवस्थापन बीचको सम्बन्ध विषयक  प्रस्तुतीकरण  गर्नुभएको थियो । आज नेफ्स्कूनका प्रमुख कार्यकारी अधिकृत प्रकाश प्रसाद पोखरेबाट सहकारीमा रणनीतिक व्यावसायिक योजना र आन्तरिक राजश्व कार्यालय धरानका प्रमुख गोविन्दराज आचार्यबाट सहकारी संघ संस्था सम्बद्ध आयकरका कानुनी व्यवस्थाहरु विषयक कार्यपत्र प्रस्तुत गर्नुभएको थियो । 

कार्यक्रममा सहभागी साकोस व्यवस्थापकहरुबाट साकोसको रणनीतिक योजना निर्माणको प्रतिवद्धता समेत जाहेर भएको नेफ्स्कूनका प्रमुख कार्यकारी अधिकृत पोखरेलले जानकारी गराउनुभयो । दुइ दिवसीय गोष्ठी साकोस सुदृढीकरणका लागि कोशेढुङ्गा बन्ने विश्वास लिइएको उहाँले व्यक्त गर्नुभयो ।