ललितपुर । राष्ट्रिय सहकारी महासंघले ‘राष्ट्रिय सहकारी पुरस्कार–२०७८’ बाट वरिष्ठ सहकारी अभियन्ता विजयराज घिमिरेलाई सम्मानित गर्ने भएको छ । मुलुकको सहकारी अभियानको सर्वोच्च निकाय महासंघले ६५ औं राष्ट्रिय सहकारी दिवसका अवसरमा शनिबार ललितपुरमा आयोजना गरेको बिशेष कार्यक्रममा गत वर्षबाट सुरु गरेको उक्त पुरस्कार यस वर्ष घिमिरेलाई प्रदान गर्ने सार्वजनिक गरेको हो । गत वर्ष उक्त पुरस्कार महासंघका संस्थापक अध्यक्ष दिपक प्रकाश बाँस्कोटालाई प्रदान गरिएको थियो । राष्ट्रिय सहकारी विकास बोर्डका पूर्व सल्लाहकार बरिष्ठ अभियन्ता घिमिरे सहकारी अभियानमा सुपरिचित नाम हो ।  स्थापनाकालदेखि नै सञ्चालक समितिमा रहेर काम गर्नुभएका घिमिरे महासंघका पूर्व उपाध्यक्ष हुनुहुन्छ भने उहाँ जिल्ला सहकारी संघ लि. ललितपुरको पूर्व अध्यक्ष समेत हुनुहुन्छ । आज घोषित  पुरस्कार अन्तर्राष्ट्रिय सहकारी दिवसको अवसरमा प्रदान गरिने महासंघले जनाएको छ । आजै महासंघले अन्य विधामा पनि पुरस्कृतहरुको नाम घोषणा गरेको छ ।