बनेपा । नेफ्स्कून बनेपा फिल्ड कार्यालयको आयोजनामा काभ्रेको बनेपामा सञ्चालित  उच्चस्तरीय लेखा व्यवस्थापन तालिम हिजो सम्पन्न भएको छ । तालिम समापन समारोहमा नेफ्स्कूनका अध्यक्ष परितोष पौड्यल प्रमुख व्यक्ति र उपाध्यक्ष शान्ति अधिकारी विशेष व्यक्तिको रुपमा रहनुभएको थियो भने नेफ्स्कूनका सदस्य सेवा विभाग प्रमुख गणेश प्रसाद तिमिल्सिना पनि सहभागी हुनुहुन्थ्यो । 

नेफ्स्कून अध्यक्ष परितोष पौड्यालले मर्यादित, व्यावसायिक र सुशासनयुक्त सहकारी निर्माणमा प्रविधि प्रयोगको औचित्यतामाथी प्रकाश पार्दै अबको सहकारी अभियान पूर्णतः डिजिटाइज हुनुपर्नेमा जोड दिनुभएको थियो । वित्तीय कारोबारको दिगोपना र संस्थाको दिगोपनाको लागि सहकारीलाई डिजिटलाईजेशन गर्नुपर्नेमा उहाँको जोड थियो । आधुनिक प्रविधिको आधारमा प्रभावकारी सञ्चालन र कुशल व्यवस्थापन गर्न सकिने भएकोले नेफ्स्कूनले एकीकृत प्रविधि निर्माण गरिरहेको र त्यसमा सम्पूर्ण साकोसहरु सहभागी हुन अनुरोध गर्नुभएको थियो । त्यसैगरी साकोसको सुदृढीकरण र कुशल व्यवस्थापनका लागि स्तरीकरण र स्थिरीकरणकोष र्निविकल्प भएको प्रस्ट्याउँदै स्थिरीकरण कोषमा योगदान रकम जम्मा गर्न सम्पूर्ण साकोसहरुलाई अनुरोध गर्नुभएको थियो । 

उपाध्यक्ष शान्ति अधिकारीले उच्च स्तरको लेखा व्यवस्थापन तालिमबाट प्राप्त ज्ञान सीप साकोस सञ्चालनका क्रममा कार्यान्वयमा ल्याउन अनुरोध गर्दै प्राप्त ज्ञान सीपबाट साकोसको कुशल व्यवस्थापन र सुदृढीकरणमा ठोस योगदान पुग्ने विश्वास व्यक्त गर्नुभएको थियो । उहाँले नेफ्स्कूनले अगाडि सारेको स्तरीकरण कार्यक्रमले साकोसलाई वित्तीय ढंगले सुरक्षित र सन्तुलित बनाउन सहयोग गर्ने र स्थिरीकरण कोषले साकोसमा पर्न सक्ने सम्भावित दुर्घटनाबाट सुरक्षा प्रदान गर्ने भएकोले साकोसहरु स्तरीकरण कार्यक्रममा र स्थिरीकरणकोषमा अनिवार्य रुपमा सहभागी हुनुपर्नेमा जोड दिनुभयो । 

तालिममा काभ्रेपलाञ्चोक, सिन्धुपाल्चोक र रामेछाप जिल्लाबाट गरी २० बचत तथा ऋण सहकारी संस्थाका २२ जना लेखा अधिकृत एवं लेखापाल कर्मचारीहरुको सहभागिता रहेको थियो ।  

५ दिवसीय उक्त तालिमको सहजीकरण नेफ्स्कूनका तालिम अधिकृत उमेश कोइराला र अनुगमन अधिकृत दिपक अर्यालले गर्नुभएको थियो । तालिम कार्यक्रम सञ्चालन सहजीकरण बनेपा फिल्ड कार्यालय इन्चार्ज राम प्रसाद सापकोटाले गर्नुभएको थियो ।