काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का बरिष्ठ उपाध्यक्ष चन्द्र प्रसाद ढकाल आज जनसेवाश्री पदकबाट विभूषित हुनुभएको छ । गत असोज ४ गते संविधान दिवसको अवसरमा घोषित उक्त विभूषणबाट सहकारी अभियन्ता ढकाल आज सम्मानित हुनुभएको हो । आज बिहान शितलनिवासमा आयोजित विभूषण सुशोभन समारोहमा राष्ट्रपति विद्यादेवी भण्डारीबाट ढकाल विभूषित हुनुभएको हो ।  राष्ट्रिय जीवनका विभिन्न क्षेत्रमा महत्वपूर्ण योगदान दिने हरुलाई प्रदान गरिने सम्मान सहकारी क्षेत्रबाट अगुवा अभियन्ता ढकाललाई प्रदान गरिएको हो ।

२०५० सालदेखि सहकारी क्षेत्रमा निरन्तर सेवारत ढकाल नेफ्स्कूनका प्रबक्ता समेत हुनुहुन्छ । राष्ट्रिय सहकारी महासंघका निवर्तमान सञ्चालक समेत रहनुभएका उहाँ नेशनल कोअपरेटर्श एलाइन्स नेपालका महासचिव एवम् सूचना चौतारी संचार सहकारी संस्था तथा उपलब्धि बहुउद्देश्यीय सहकारी संस्था र कास्कूनका सल्लाहकार, सँगै विभिन्न सहकारीहरुमा स्वयंसेवी भूमिकामा आबद्ध हुनुहन्छ । नेपालमा सहकारी र बिशेषतः बचत तथा ऋण सहकारी अभियानको विकास, प्रवर्धन र सम्बर्धनमा उहाँको महत्वपूर्ण भूमिका रहँदै आएको छ ।

 बरिष्ठ उपाध्यक्ष ढकालले यो सम्मान सम्पूर्ण सहकारी क्षेत्रको सम्मान भएको प्रतिक्रिया जनाउनुभयो । यसलाई प्रेरणा मानेर अभियानको विकासमा थप उर्जावान् भएर लाग्ने प्रतिबद्धता समेत उहाँले जनाउनुभयो । नेपालको संविधानको धारा २७७ को उपधारा ९१० बमोजिम गत भदौ २९ गतेको मन्त्रिपरिषद्का सिफारिसमा राष्ट्रपति भण्डारीले ती विभूषण प्रदान गर्ने घोषणा गत असोज ३ मा गर्नुभएको हो ।