भक्तपुर ।  जिल्ला बचत तथा ऋण सहकारी संघ लि. भक्तपुरको तालिम व्यवस्थापन उपसमितिको आयोजना र नेफ्स्कूनको प्राविधिक सहयोगमा दुई दिवसिय कर तथा कोष व्यवस्थापन तालिम विहिबार सम्पन्न भएको छ । 

बचत संघका अध्यक्ष कृष्ण गोविन्द लाखाजुले संस्थाको कर तथा कोष व्यवस्थापन उच्च व्यवस्थापनका कर्मचारीको काम भएकोले सोबारे क्षमता बृद्धिमा तालिमले टेवा पुर्याउने विचार व्यक्त गर्नुभयो । उहाँले सहकारी संघ संस्था बीचको कारोबारमा अग्रिम व्याजकर १५ प्रतिशत लागु हुुनु अव्यवहारिक र अन्यायपूर्ण रहेको भन्दैं सुधारको लागि सम्बन्धित निकायमा अवाज उठाउदैं आएको बताउनुभयो । सहकारी संस्थाहरुमध्ये ७० प्रतिशत सहकारी संस्था स्थानीय तह अन्र्तगत सञ्चालनमा रहेकोले स्थानीय चुनावमा सहकारीको विकासका एजेन्डाबारे सहकारीकर्मी सचेत हुन उहाँले आग्रह गर्नुभयो ।

संघका सचिव एंव उपसमितिका संयोजक जगनाथ प्रजापतिले संस्थाले कर तथा कोष व्यवस्थापन सहितको आर्थिक विवरणबारे अध्ययन तथा जानकारी राख्नसकुन् भन्ने उद्देश्यले तालिमको आयोजना गरेको बताउनुभयो । तालिमले संस्थाको कर योजना तथा व्यवस्थापनले सम्भाव्य दण्ड जरिवानाबाट बच्न टेवा पुर्याउने विचार व्यक्त गर्नुभयो ।

उपसमितिका सदस्य विकुलाल सुवालले धन्यवाद मन्तव्य दिदैं सिकेका कुराहरुको व्यवहारिक प्रयोग गर्नुपर्ने विचार राख्नुभयो । सि.ए. विजय सुकुपायोले कर व्यवस्थापनबारे र नेपाल बचत तथा ऋण केन्द्रीय सहकारी संघका तालिम अधिकृत उमेश कोइरालाले कोष व्यवस्थापनबारे सहजीकरण गर्नुभएको थियो । 

तालिमको समापन समारोह संचालन उपसमितिका सदस्य चन्डिका छुंकाले गर्नुभएको थियो । तालिममा सहभागीहरुले धेरै कुराहरु सिक्न पाएँकोमा खुशि व्यक्त गर्दै तालिमबाट अग्रिम कर कट्टी, कर दरहरु, राजश्व शिर्षक, अनलाइन कर दाखिला, इटिडिएस, कोष बाँडफाँड, कोषको उपयोगिता लगायतका विषयहरु सिकेको बताउनुभयो । 

तालिममा संस्थामा कार्यरत ३२ जना कर्मचारीहरुको सहभागिता थियो ।