काठमाडौं । चन्द्रागिरी नगरपालिका–१३, पुरानो नैकाप मा रहेको गृहिणी सेवा बचत तथा ऋण सहकारी संस्था लि.कर्ब्स कार्यक्रममा आबद्ध भएको छ । कर्ब्स कार्यक्रम नेफ्स्कूनले सञ्चालन गरेको जोखिममा आधारित साकोस सुपरिवेक्षण कार्यक्रम हो । जिल्ला संघ साझेदारी कार्यक्रम अन्तर्गत काठमाडौं जिल्ला बचत संघ (कास्कून) र नेफ्स्कूनको संयुक्त कार्यक्रम मार्फत गृहिणी सेवा साकोस आज कर्ब्समा आबद्ध भएको हो । 

साकोसको कार्यालयमा आयोजित एक संक्षिप्त कार्यक्रमका बीच साकोसकी अध्यक्ष शोभा भट्ट गौतम, नेफ्स्कूनको तर्फबाट कार्यक्रम अधिकृत सोबिता मैनाली र कास्कूनको तर्फबाट कार्यक्रम अधिकृत नवराज सुवेदीले सम्झौतापत्रमा हस्ताक्षर गर्नुभएको थियो । 

कार्यक्रममा साकोसका पदाधिकारीहरु, सञ्चालक सदस्यहरु, नेफ्स्कून कलंकी फिल्ड कार्यालयकी इन्चार्ज अस्मिता अधिकारी र कर्मचारी प्रभाकर घिमिरे उपस्थित हुनुहुन्थ्यो ।