नवलपरासी । गैडाकोट–१६ अमरापुरीमा रहेको अमर बचत तथा ऋण सहकारी संस्था लि.को आयोजनामा कर्मचारीहरुको क्षमता विकास आधारभूत तालिम सम्पन्न भएको छ । 

साकोसका अध्यक्ष प्रजापति कंडेलको अध्यक्षतामा सुरु भएको तालिममा सचिव श्यामसुन्दर लामिछाने र कोषाध्यक्ष आनन्दकुमार पंगालीले शुभकामना मन्तव्य व्यक्त गर्नुभएको थियो । 

साकोसका सचिव लामिछानेले तालिमलाई बढीभन्दा बढी अन्र्तक्रियात्मक बनाएर तालिमबाट प्राप्त ज्ञान सीपको उपयोगितामा जोड दिन सहभागीहरु समक्ष अनुरोध गर्नुभयो । कोषाध्यक्ष पंगालीले तालिम कर्मचारीहरुको क्षमता विकासमार्फत संस्थागत विकास र सफलतासँग जोडिने हुँदा तालिमबाट भरपुर लाभ हासिल गरी कार्यक्षेत्रमा प्रयोगमा ल्याउनुपर्नेमा जोड दिनुभयो । 

अध्यक्ष कंडेलले तालिम प्रभावकारी बनाउन र कर्मचारीहरुलाई पुनर्ताजगीकरण समेत होस् भन्ने हेतुले कार्यालयभन्दा बाहिर तालिम सञ्चालन गरिएको बताउनुभयो । उहाँले कर्मचारी संस्था सञ्चालनको मेरुदण्ड भएकोले सक्षम र क्षमतावान् कर्मचारी विकासमा जोड दिनुपर्ने विचार राख्दै तालिम पश्चात् संस्थागत गतिविधि थप प्रभावकारी बन्ने विश्वास व्यक्त गर्नुभयो ।  

वैशाख १७ र १८ गते चितवनको कविलास रिसोर्टमा  सञ्चालित तालिमको सहजीकरण नेफ्स्कूनका तालिम अधिकृत उमेश कोइरालाले गर्नुभएको थियो । तालिममा साकोसका १४ जना कर्मचारीहरुको सहभागिता रहेको थियो । कार्यक्रम सञ्चालन साकोसका सञ्चालक सदस्य चन्द्र प्रसाद पराजुलीले गर्नुभएको थियो । 

कर्मचारीहरुलाई तालिम प्रदान गरेसँगै वैशाख १९ गते साकोस नेफ्स्कूनले सञ्चालन गरेको राष्ट्रिय स्तरको साकोसहरुको गुणस्तर सुनिश्चितता सम्बन्धी पूर्ण तथा व्यावसायिक साकोस विकास कार्यक्रम -प्रोबेसनमा आबद्ध भएको थियो ।