काठमाडौं । ललितपुरको महालक्ष्मी नपा–९, लामाटारमा रहेको ब्रम्हपुरी बचत तथा ऋण सहकारी संस्था लि.को आयोजनामा साकोसहरुबीच असल सिकाई आदानप्रदान कार्यक्रम सम्पन्न भएको छ । साकोसका उपाध्यक्ष गणेश प्रसाद घिमिरेको अध्यक्षतामा आयोजित कार्यक्रमका प्रमुख अतिथि नेफ्स्कूनका कोषाध्यक्ष दिपक पनेरु रहनुभएको थियो । 

प्रमुख अतिथि कोषाध्यक्ष पनेरुले साकोस सुदृढीकरणका लागि नेफ्स्कूनद्वारा सञ्चालित जोखिममा आधारित साकोस सुपरिवेक्षण कार्यक्रम (कर्ब्स) पहिलो खुड्कीलो भएको प्रस्ट पार्नुभयो । साकोस सञ्चालनमा सुशासन महत्वपूर्ण विषय हो उहाँले भन्नुभयो, “कोभिड महामारीको प्रभावले केही चुनौतिहरुको सामना गर्नुपरेपनि अब स्थिति सकारात्मक रहेकोले सदस्य केन्द्रीत सेवा प्रवाहसँगै संस्थागत सुधार र गुणस्तर सुनिश्चिततालाई विशेष ध्यान दिनुपर्ने बेला आएको छ ।” नेफ्स्कून सदस्य संस्थाको हित र संरक्षणका लागि सदैब सरकार र  विभिन्न सरोकारवाला निकायहरुसँग समन्वयकारी भूमिकामा रहदै आएको पनि उहाँले जानकारी गराउनु भयो । साकोसहरुले पनि सहकारी कर्मबाट सदस्यहरुको जीवनस्तरमा आएको परिवर्तन र उपलब्धी को समिक्षा गर्नु पर्ने बेला भएको छ, उहाँले भन्नुभयो । 

कार्यक्रमको समापन सत्रमा आयोजक संस्थाका अध्यक्ष राम शरण घिमिरेले नेफ्स्कूनद्वारा सञ्चालित जोखिममा आधारित साकोस सुपरिवेक्षण कार्यक्रमले संस्थालाई नियमित कानुनी परिपालना र सदस्य हितमा काम गर्न मार्ग निर्देशन गरेको बताउदै नेफस्कूनले सबै बचत ऋण सहकारीलाई नेफ्स्कूनमा आवद्ध गराएर सहकारी सञ्चालनमा नीति र विधिगत एकरुपता कायम गर्न पहल गर्नुपर्नेमा जोड दिनुभयो ।

कार्यक्रममा अष्ट मातृका साकोस, नब दुर्गा साकोस, दिपावती साकोस, समता साकोस, जागरुक महिला साकोस, पुश्पान्जली साकोस, शिक्षक हित साकोस र आयोजक संस्था ब्रह्म पुरी साकोसको प्रस्तुती र असल सिकाई अभ्यास आदान प्रदान भएको थियो । कार्यक्रम सहजीकरण नेफ्स्कूनकी कार्यक्रम अधिकृत सोबिता मैनालीले गर्नुभएको थियो ।