काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजनामा यहि जेठ २९ र ३० गते सञ्चालन हुन गइरहेको साकोस शिखर गोष्ठीमा सहभागी नाम दर्ताको समयावधि थप गरिएको छ । 

संघले सहुलियतपूर्ण सहभागिता शुल्क सहित सहभागी दर्ता गर्ने समयसीमा जेष्ठ ७ गतेसम्म कायम गरिएको भएपनि स्थानीय निर्वाचन र लगातारका विदाको कारण उक्त समयावधि थप गरि जेष्ठ १७ गतेसम्म कायम रहने जनाएको छ । विशेष कारणबश सहभागी दर्तामा ढिलाई हुनुगएमा जेष्ठ १८ देखि २० सम्म अतिरिक्त शुल्क लाग्ने निर्णय संघले गरेको छ । 

साकोस शिखर गोष्ठी तयारी सम्बन्धमा आज संघको सभाहलमा तयारी उपसमिति बैठक बसेको थियो । उपसमिति संयोजक एवम् संघकी उपाध्यक्ष शान्ति अधिकारीको संयोजकत्वमा बसेको बैठकले सहभागी नाम दर्ता समयावधि थप गर्ने निर्णय गरेको हो । संघका अध्यक्ष परितोष पौड्यालको विशेष उपस्थिति सहित बसेको बैठकमा महासचिव दमोदर अधिकार, कोषाध्यक्ष दिपक पनेरु, संचालक सदस्य गोमा नेपाल, कमला देवी गिरी र व्यवस्थापन तर्फबाट प्राचार्य एवम् निमित्त प्रमुख कार्यकारी अधिकृत सन्जय राज तिमिल्सीना र वित्त तथा सामान्य सञ्चालन विभाग प्रमुख राधेश्याम श्रेष्ठ सहभागी हुनुहुन्थ्यो । 

बैठकले गोष्ठी तयारीको प्रगति समिक्षा, व्यवस्थापकीय कार्य विभाजन, स्रोतव्यक्तिहरु बीचको समन्वय लगायतका विषयहरुमा निर्णय गरेको छ ।