काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को शिक्षा तथा स्रोत केन्द्र उपसमितिको बुधबार बसेको बैठकले तालिम तथा शिक्षाका कार्यक्रमलाई थप प्रभावकारी बनाउन आगामी योजना सम्बन्धमा विस्तृत छलफल गरेको छ । सदस्य संघ संस्थाहरुको क्षमता अभिवृद्धि तथा दिगो विकासका लागि मागमा आधारित सहभागितामूलक तथा निःशूल्क तालिमहरु सञ्चालन गर्ने सम्बन्धमा आगामी बर्षको बजेट तथा योजना निर्माणलाई बैठकले विशेष जोड दिइएको संघका महासचिव एवम् शिक्षा तथा स्रोत केन्द्र उपसमितिका संयोजक दामोदर अधिकारीले जानकारी गराउनुभयो । 

संघकी उपाध्यक्ष शान्ति अधिकारीको आतिथ्यता एवम् उपसमिति संयोजक, संघका महासचिव अधिकारीको संयोजकत्वमा बसेको बैठकले संघको तालिम तथा शिक्षाका कार्यक्रमहरुको हालसम्मको प्रगति समिक्षा समेत गरेको थियो । समितिमा आबद्ध साकोसका प्रतिनिधिहरु क्रमशः रामहरि के.सी, वीरेन्द्र भण्डारी, ज्ञानु पौड्याल र रामशरण घिमिरे हुनुहुन्छ । 

बैठक सहजीकरण संघका प्राचार्य एवम् निमित्त प्रमुख कार्यकारी अधिकृत सन्जय राज तिमिल्सीनाले गर्नुभएको थियो ।