काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) ले एकीकृत सूचना व्यवस्थापन प्रणाली (कोपोमिस) मा सहकारीको समष्टिगत विवरण भर्न आवद्ध सदस्य संघ संस्थाहरुमा अनुरोध गरेको छ । संघको केन्द्रीय कार्यालय सहित सम्पूर्ण फिल्ड कार्यालय मार्फत आफ्ना सदस्य संस्थाहरुलाई कोपोमिसमा आबद्धताका लागि सहजीकरण गर्न गराउन आव्हान गरेको छ । 

संघीय सहकारी विभागले कोपोमिसमा सहकारीको समष्टिगत विवरण भर्न सहकारीका शीर्ष संघहरुमा पत्राचार गरेसँगै नेफ्स्कूनले आफ्ना सदस्यहरुलाई कोपोमिसमा आबद्ध गराउन सघाउने प्रतिवद्धता व्यक्त गरेको छ । संघमा आबद्ध सहकारीहरुमध्ये कोपोमिसमा नआएका सहकारीहरुको डाटा पहिचानका लागि समेत नेफ्स्कूनले प्रक्रिया अगाडि बढाएको जनाएको छ । 

विभागले सहकारी महासंघ, विषयगत केन्द्रीय संघहरु र अन्य सरोकारवाला संघ संस्थाका कर्मचारीहरुलाई आफ्ना सदस्यहरुको समष्टिगत विवरण भर्न सहजीकरण होस् भन्ने उद्देश्यसहित जेठ ५ र ६ गते दुई दिवसीय प्रशिक्षक प्रशिक्षण (ToT) तालिम समेत गराएको थियो । नेफ्स्कूनबाट सो तालिमका लागि ३ जना कर्मचारी सहभागी हुनुहुन्थ्यो । 

विभागले कोपोमिस कार्यान्वयन प्रभावकारीताका लागि सोमबार राष्ट्रिय सहकारी महासंघ लगायत सम्पूर्ण सहकारी संघ संस्थाहरुलाई असार मसान्तसम्म आबद्ध हुन भनि निर्देशन पत्राचार गरेको थियो ।  विभागले युजर नेम नलिएका सहकारीले पनि सम्बन्धित नियामक निकायबाट लिएर कोपोमिसमा सूचना प्रविष्ट गर्न भनेको छ । 

विभागले तोकिएको समयभित्र कोपोमिसमा नआउने सहकारीलाई सहकारी ऐन २०७४ अनुसार कारवाही गर्ने तथा सहकारीका सेवा सुविधा रोक्न सकिने पनि जनाएको छ । सहकारीले हरेक महिनाको ७ गतेभित्र मासिक विवरण, प्रत्येक चौमासिक अवधि व्यतित भएको १५ दिन भित्र चौमासिक र प्रत्येक आर्थिक वर्ष व्यतित भएको ३० दिन भित्र वार्षिक वित्तीय प्रतिवेदन पेश गर्नुपर्ने कानुनी व्यवस्था छ भने ऐनले कोपोमिसमा नआउने सहकारीलाई तीन लाख सम्म जरिवाना हुने व्यवस्था गरेको छ ।

विवरणमा सहकारी संस्थाको नाम, फोन, सम्पर्क ठेगाना, सदस्य, सेयरपुँजी, कर्मचारी, बचत, कर्जा लगानी लगायतको समष्टिगत विवरण राख्नुपर्ने छ ।

सहकारी विभागका रजिष्ट्रार रुद्रप्रसाद पण्डितले बुधबार कोपोमिस प्रणालीमा सहकारी संघ संस्थाहरुले बार्षिक रुपमा अनिवार्य प्रविष्टि गर्नुपर्ने समष्टिगत विवरण भर्ने तरिका समेत सार्वजनिक गर्नुभएको छ ।