चितवन । भरतपुर महानगरपालिका १६, गाविस चोक स्थित मंगलपुर बचत तथा ऋण सहकारी संस्थाका सञ्चालकहरुको क्षमता अभिबृद्धि तालिम (CUDCC) काभ्रेको पनेपामा हिजो सम्पन्न भएको छ ।
 
तालिमको समापन समारोहमा प्रमुख अतिथि नेफ्स्कूनका अध्यक्ष परितोष पौड्याल र अतिथिहरुमा बागमती प्रदेश बचत संघका अध्यक्ष उद्धव सापकोटा, प्रदेश बचत संघका प्रमुख कार्यकारी अधिकृत केशव दाहाल, नेफ्स्कूनका बरिष्ठ अधिकृत नविनराज दाहाल र  मंगलपुर साकोसका अध्यक्ष एवम् समापन समारोहका सभापति बाबुराम परियार रहनुभएको थियो । 

प्रमुख अतिथि नेफ्स्कूनका अध्यक्ष परितोष पौड्यालले सहकारी अभियानको विकास र सुदृढीकरणका लागि प्राविधिक शिक्षा र प्रविधि प्रयोगको आवश्यकतामाथी चर्चा गर्नुभयो । उहाँले वित्तीय कारोबारलाई सुरक्षित र भरपर्दो बनाउन डिजिटलाइजेसनमा जानुको विकल्प नरहेको बताउँदै नेफ्स्कूनले निर्माण गरेको एकीकृत प्रविधिमा सम्पूर्ण साकोसहरु सहभागी हुन अनुरोध गर्नुभएको थियो ।

तालिम समापनका क्रममा प्रोस्कूनका अध्यक्ष सापकोटा र प्रमुख कार्यकारी अधिकृत दाहालले साकोसको सफलताका लागि शुभकामना व्यक्त गर्नुभएको थियो भने साकोसका उपाध्यक्ष रामशरण पण्डितले साकोसको संस्थागत तथा वित्तीय अवस्थाबारे जानकारी गराउनुभएको थियो ।

साकोसको आयोजनामा भएको तालिममा नेफ्स्कूनको प्राविधिक सहजीकरण रहेको थियो । तालिममा साकोसका सञ्चालक समिति, लेखा सुपरिवेक्षण समिति, उपसमिति र कर्मचारी समेत गरी १८ जनाको  सहभागिता थियो । जेठ १२ देखि १६ गतेसम्म सञ्चालित उक्त तालिमको सहजीकरण नेफ्स्कूनका बरिष्ठ अधिकृत नविनराज दाहाल र तालिम अधिकृत सुमनाराज घिमिरेले गर्नुभएको थियो । कार्यक्रम सञ्चालन साकोसका व्यवस्थापक रामजी घिमिरेले गर्नुभएको थियो ।