कञ्चनपुर । सुदूरपश्चिमको कैलाली र कञ्चनपुरमा सञ्चालित बचत तथा ऋण सहकारी संस्थाका कर्मचारीहरुका लागि ऋण व्यवस्थापन तालिम प्रदान गरिएको छ । नेफ्स्कूनको आयोजनामा जेठ १८ देखि २० सम्म कैलालीको धनगढीमा सञ्चालित तालिममा उक्त दुई जिल्लाका १८ बचत तथा ऋण सहकारी संस्थाबाट २२ जना कर्मचारीहरुको सहभागिता रहेको थियो । 

तालिमको समापन नेफ्स्कूनका सञ्चालक सदस्य माधव प्रसाद जोशीले गर्नुभएको थियो । सो अवसरमा नेफ्स्कून कञ्चनपुर फिल्ड कार्यालय व्यवस्थापन उप–समिति सदस्य द्वय भुपेन्द्र थापा र  सुरत बोगटी उपस्थित हुनुहुन्थ्यो ।

नेफ्स्कूनका सञ्चालक जोशीले सहकारी संस्थाले सदस्यहरुबाट लिएको पैसा सदस्यहरुकै लागि परिचालन गर्दा विशेष सावधानी अपनाउनुपर्ने बताउनुभयो । सहकारी संघ संस्थामा आवद्ध सदस्यहरुको आयस्तर वृद्धि गर्न, स्वरोजगार सिर्जना गर्न, गरिबी निवारण गर्न, सदस्यहरुलाई उद्यमी बनाउन र आर्थिक गतिविधिमा रकम परिचालन गर्न ऋणको गुणस्तर सुधारका साथै ऋण नीति कडाईका साथ कार्यन्वयन गर्नुपर्नेमा उहाँले जोड दिनुभयो । संस्थाले ऋण लगानी गर्ने क्रममा ऋणको प्राथमिकता, सदस्यहरुको आवश्यकता र ऋणको सदुपयोगिताका विषयमा ध्यान दिनुपर्ने हुँदा कर्मचारीहरु ऋण व्यवस्थापन प्रक्रियामा जानकार र दक्ष हुन पनि समय समयमा यस्ता तालिम आवश्यक रहने उहाँले बताउनुभयो ।   

तालिम सहजिकरण संघका तालिम अधिकृत रविन्द्र श्रेष्ठ र कार्यक्रम सञ्चालन तथा व्यवस्थापन कञ्चनपुर फिल्ड कार्यालय इन्चार्ज यम डाँगी र सेवा केन्द्र प्रमुख योगेश बोहराले गर्नुभएको थियो ।