भक्तपुर । भक्तपुर जिल्ला बचत तथा ऋण सहकारी संघ लि.को वित्तीय सेवा प्रवर्धन उपसमितिको आयोजनामा सिद्धि गणेश तालिम हल, खँचा, भक्तपुरमा दुई दिने बार्षिक योजना तथा बजेट तालिम सोमबार सम्पन्न भएको छ ।

संघका अध्यक्ष कृष्ण गोविन्द लाखाजुले सरकारी र सहकारीका बजेटमा फरक रहेको बताउदै बजेटका सबै प्रक्रियाहरु पुरा गरेर बनाएको बजेट सफल हुने बताउनुभयो । उहाँले समुदायमा आधारित सहकारी संस्थालाई पुर्ण रुपमा कर छुट हुनुपर्नेमा सरकारले बजेट मार्फत करको दर बढाउनु न्यायोचित नभएको प्रष्ट पार्नुभयो ।  सहकारी संघ संस्था बीच हुने अन्तर कारोबारमा अग्रिम व्याजकर खारेज गर्नुपर्ने माग बजेटले सम्बोधन गर्न नसकेकोमा पनि दुख व्यक्त गर्नुभयो । 

संघका कोषाध्यक्ष एवं वित्तीय सेवा प्रवर्धन उपसमितिका संयोजक कान्छाभक्त घजुले संस्थाको बार्षिक योजना तथा बजेट निर्माण कार्यलाई सहयोग पुर्याउने उद्देश्यले तालिमको आयोजना गरेको बताउनुभयो । संस्थाको परिकल्पना, ध्येय र उद्देश्यहरु हासिल गर्न व्यावसायिक तथा रणनीति योजनाहरुको महत्व बताउदैं ती योजनाको आधारमा बार्षिक योजना तथा बजेट निर्माण गर्नुपर्नेमा उहाँले जोड दिनुभयो ।  

प्रशिक्षक अनिल वीर बज्राचार्यको सहजिकरणमा सम्पन्न भएको तालिमको समापन समारोहमा संघको वित्तीय सेवा प्रवर्धन उपसमितिका सदस्य राजाराम गोसाईले स्वागत मन्तव्य व्यक्त गर्दै तालिमबाट सिकेका कुरा संस्थामा प्रयोग गर्न र संस्थाका पदाधिकारीहरुलाई सिकाई हस्तान्तरण गर्नुपर्ने विचार राख्नुभयो । उपसमितिका सदस्य राजकुमार लघुले कार्यक्रम संचालन गर्नुभएको थियो । तालिममा आबद्ध सदस्य संस्थाका ४१ जना पदाधिकारी एवम् कर्मचारीहरुको सहभागिता रहेको थियो ।