काठमाडौं । गोकर्णेश्वर नगरपालिका–५ मा अवस्थित नयाँपाटी बचत तथा ऋण सहकारी संस्थाले आफ्ना सदस्यहरुलाई व्यावसायिक कृषि खेतीतर्फ आकर्षिक गराउँदै च्याउ तथा कुरीलो खेती सम्बन्धी तालिम प्रदान गरेको छ । 

जेठ २१ र २२ गते साकोसको सभाहलमा आयोजित तालिममा साकोसका २८ जना उद्यमशील सेयर सदस्यहरुको सहभागिता रहेको थियो । सहभागी सदस्यहरुमध्ये १८ जना नयाँ कृषि उद्यम थालनीका लागि तालिममा सहभागी हुनुभएको थियो भने १० जना व्यावसायिक च्याउ खेतीमा संलग्न सदस्यहरु नै हुनुहुन्थ्यो । व्यावसायिक रुपमा कन्या च्याउ खेती गरिरहनुभएका दश उद्यमी सदस्यहरुलाई साकोसले नयाँ प्रविधि विस्तार साथै खाली ठाउँहरुमा कुरीलो खेती गर्न सकिने तालिम प्रदान गरेको साकोसका प्रवन्धक रमेश श्रेष्ठले जानकारी गराउनुभयो । 

कन्या च्याउ तथा कुरीलो खेती गर्ने सम्भावित उद्यमी सदस्यहरुलाई लक्षित गरी साकोसले विज्ञ प्रशिक्षकद्वारा तालिम प्रदान गरिएको प्रवन्धक श्रेष्ठले बताउनुभयो । 

दुई दिवसीय उक्त तालिममा प्रशिक्षक डा. केदार बुढाथोकीले कन्या च्याउ सम्बन्धी तालिम दिनुभएको थियो । डा. बुढाथोकी जापानको च्याउ खेती सम्बन्धी अध्ययन र अनुभव प्राप्त व्यक्ति हुनुहुन्छ । त्यस्तै प्रशिक्षक सिताराम तिमल्सेना र सुुभास तिमल्सेनाले च्याउ र कुरीलो खेती सम्बन्धी तालिम प्रदान गर्नुभएको थियो । तालिम कार्यक्रममा गोकर्णेश्वर नगरपालिकाका कृषि अधिकृत इन्द्र कुमारी खड्काले पनि व्यावसायिक र अर्र्यानिक कृषि खेतीको महत्वबारे जानकारी गराउनुभएको थियो । 

साकोसको कृषि तथा सहकारी उपसमितिको आयोजनामा सञ्चालित तालिममा उपसमितिका संयोजक गमन तामाङ, साकोसका अध्यक्ष गौतम खनाल, सञ्चालक समितिका सदस्यहरु, प्रवन्धक रमेश श्रेष्ठ र उद्यमी सेयर सदस्यहरु उपस्थित हुनुहुन्थ्यो ।