विर्तामोड । झापाको विर्तामोड नगरपालिका–४ मा रहेको कर्णाली बचत तथा ऋण सहकारी संस्था लि. का उपाध्यक्ष इश्वरी प्रसाद खरेलको शुक्रबार दुर्घटनामा परि निधन भएको छ । साकोसका पदाधिकारी र कर्मचारी सवार स्कारर्पियो इलामको हर्कटेमा शुक्रबार साँझ दुर्घटना हुँदा उपाध्यक्ष खरेलको निधन भएको हो भने गाडीमा सवार अन्य घाइते हुनुभएको छ । 

इलामको फिक्कलमा कर्णाली साकोसको सेवाकेन्द्र विस्तार गर्ने सिलशिलामा साकोसको टोली त्यसतर्फ पुगेको साकोसका जनशक्ति विभाग प्रमुख लक्ष्मीनारायण भट्टराइले जानकारी गराउनुभयो । सवारीमा साकोसका अध्यक्ष टसबहादुर प्रधान, उपाध्यक्ष इश्वरी प्रसाद खरेल, कोषाध्यक्ष एकराज विष्ट, सञ्चालक सदस्य गणेश पराजुली र अन्य दुई कर्मचारी हुनुहुन्थ्यो । सञ्चालक सदस्य पराजुली स्वयं स्कार्पियो चालक हुनुहुन्थ्यो । 

कर्णाली साकोसलाई क्रियाशिल बनाउनमा उपाध्यक्ष खरेलको महत्वपूर्ण योगदान रहेको थियो । २०२१ साल श्रावण ९ गते जन्मनुभएका सहकारी अभियन्ता खरेल ५८ बर्षको हुनुहुन्थ्यो । उपाध्यक्ष खरेलको निधनबाट सहकारी अभियानमा अपुरणीय क्षति पुगेको छ । २०५७ सालमा स्थापित समुदायमा आधारित कर्णाली साकोसले करिब ५० हजार सेयर सदस्यबीच ३ अर्ब ७५ करोड रुपैंयाको पुँजी परिचालन गरिरहेको छ ।  

दुर्घटनामा घाइते साकोसका अन्य पदाधिकारी एवम् कर्मचारीहरु खतरा मुक्त रहनुभएको जानकारी प्राप्त भएको छ । दुर्घटनामा परि निधन हुनभएका उपाध्यक्ष खरेलप्रति हार्दिक श्रद्धाञ्जली साथै घाइतेहरुप्रति शीघ्र स्वास्थ्य लाभको कामना गर्दछौं ।