सुर्खेत । नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजनामा सुर्खेतको विरेन्द्रनगरमा सहकारीमा महिला नेतृत्व विकास तालिम सञ्चालन भएको छ । तालिम नेफ्स्कूनकी सञ्चालक गोमा नेपालको प्रमुख आतिथ्यता र सुर्खेत फिल्ड व्यवस्थापन उपसमिति सदस्य लक्ष्मी कुमारी उपाध्यायको अध्यक्षतामा सुरु भएको छ । 

प्रमुख अतिथि नेफ्स्कूनकी सञ्चालक गोमा नेपालले ग्रामिण दुर्गम स्थानमा रहेका महिलाद्वारा सञ्चालित बचत तथा ऋण सहकारी संस्थाका पदाधिकारी, सञ्चालक एवम् नेतृत्व तहमा रहेका महिला दिदीबहिनीहरुलाई लक्षित गरेर तालिम आयोजना गरिएको बताउनुभयो । उहाँले सहकारीको विकास र प्रवर्धनका क्षेत्रमा महिला दिदीबहिनीहरु मार्फत गाउँ गाउँमा पुगेर सहकारीको जागरण र विकासका काममा अगाडि बढ्न अनुरोध समेत गर्नुभयो । 

असार २ र ३ गते सञ्चालित तालिममा जिल्लाका विभिन्न बचत तथा ऋण सहकारी संस्थाबाट २३ जनाको सहभागिता रहेको छ । तालिमको सहजीकरण नेफ्स्कूनका कार्यक्रम अधिकृत गणेश प्रसाद रेग्मीले गर्नुभएको छ । नेफ्स्कून सुर्खेत फिल्ड कार्यालय ईन्चार्ज चन्द्रदेव जोशीले सञ्चालन गर्नुभएको कार्यक्रमको व्यवस्थापन सहजीकरण फिल्ड कार्यालय सहायक मदन कुमार चन्दले गर्नु भएको थियो ।