नवलपुर। जिल्लाका बचत तथा ऋण सहकारी संस्थाहरुलाई लक्षित गरी आज नेफ्स्कूनद्वारा कोपोमिस दाखिला तथा भाखा नाघेको ऋण व्यवस्थापन कार्यक्रम सञ्चालन गरिएको छ । तालिममा संघमा आबद्ध १७ बचत तथा ऋण सहकारी संस्था र आबद्धताको प्रक्रियामा रहेका थप ९ बचत तथा ऋण सहकारी संस्थाबाट ३१ जना सहकारीकर्मीहरुको सहभागिता रहेको थियो । 

किसान बचत तथा ऋण सहकारी संस्थाको क्षेत्रीय कार्यालय कावासोतीको सभाहलमा आयोजित कार्यक्रम नवलपुर जिल्ला बचत संघका का.वा अध्यक्ष होमनाथ जैशीकोको बिशेष उपस्थितिका बीच सम्पन्न भएको थियो । 

नवलपुर जिल्ला बचत संघका का.वा अध्यक्ष जैशीले जिल्ला बचत संघ र नेफ्स्कूनमा सदस्य नरहेका बचत तथा ऋण सहकारी संस्थाहरुलाई सदस्यताका लागि आव्हान गर्नुभएको थियो । नवलपुरमा रहेका संस्थाहरुमा सम्बन्ध प्रगाढ बनाउन नेफ्स्कून र जिल्ला बचत संघ सँगको समन्वयमा विभिन्न लागत रहित वा लागतमा सहभागितामुलक कार्यक्रम तथा तालिम गर्ने प्रतिबद्धता समेत व्यक्त गर्नुभएको थियो । उहाँले नवलपुरमा नेफ्स्कूनको सेवा केन्द्र स्थापनाको माग समेत रहेको उल्लेख गर्नुभयो ।  

भाखा नाघेको ऋण व्यवस्थापन कार्यक्रम सहजीकरण नेफ्स्कून चितवन फिल्ड कार्यालयका इन्चार्ज रिषभराज रेग्मी र कार्यक्रम अधिकृत सुरज चालिसेले गर्नुभएको थियो भने कोपोमिस दाखिला सम्बन्धी नेफ्स्कूनका सूचना प्रविधि शाखाका कर्मचारी अर्जुन गुरुङ्गले गर्नुभएको थियो ।