काठमाडौं । जिल्ला बचत संघ मोरङको आयोजनामा सञ्चालन हुन गईरहेको साकोस गोष्ठी भोलिदेखि पथरी शनिश्चरेमा सुरु हुँदैछ । साकोस गोष्ठी सहभागिताका लागि नेफ्स्कूनका अध्यक्ष परितोष पौड्याल, महासचिव दामोदर अधिकारी र नेपाल सरकारका पूर्व सचिव गोपीनाथ मैनाली आज मोरङ पुग्नुभएको छ । असार १८ र १९ गते दुई दिन सञ्चालन हुने गोष्ठीमा जिल्लाभरका साकोस अभियानकर्मीहरुको सहभागिता रहनेछ । गोष्ठीमा नेफ्स्कूनका महासचिव दामोदर अधिकारी, नेपाल सरकारका पूर्व सचिव गोपीनाथ मैनाली, कानेपोखरी गाउँपालिकाका निवर्तमान अध्यक्ष ताराबहादुर काफ्ले, राष्ट्रिय सहकारी बैंकका प्रमुख कार्यकारी अधिकृत बद्रीकुमार गुरागाई र डिग्री क्याम्पस विराटनगरका प्राध्यापक डा.अर्जुन बरालले कार्यपत्रहरु प्रस्तुत गर्ने कार्यक्रम रहेको छ ।

साकोस गोष्ठीमा ५ वटा कार्यपत्रहरु प्रस्तुत हुने बचत संघ मोरङका बरिष्ठ उपाध्यक्ष प्रेम प्रकाश कोईराला जानकारी गराउनुभएको छ । 

संघले पहिलो साकोस गोष्ठी २०७५ साल बैशाख ३० र ३१ गते सम्पन्न गरेको थियो ।