ललितपुर । वरिष्ठ सहकारी अभियन्ता, राष्ट्रिय सहकारी बैंकका संस्थापक एवम् राष्ट्रिय सहकारी महासंघका पूर्व उपाध्यक्ष विजयराज घिमिरे ‘राष्ट्रिय सहकारी पुरस्कार’ बाट सम्मानित हुनुभएको छ ।

राष्ट्रिय सहकारी महासंघ, नेपालले घिमिरेलाई उक्त सम्मान प्रदान गर्ने घोषणा ६५ औं राष्ट्रिय सहकारी दिवसका अवसरमा चैत २० गते गरेको थियो । महासंघले १०० औं अन्तर्राष्ट्रिय सहकारी दिवसको अवसरमा आज आयोजित विशेष समारोहमा उहाँलाई उक्त पुरस्कार बाट सम्मानित गरेको हो । प्रमुख अतिथि भूमि व्यवस्था, सहकारी तथा गरिबी निवारण मन्त्री शशी श्रेष्ठ, सहकारी मन्त्रालयका सचिव रामप्रसाद थपलिया, विभागका रजिष्ट्रार रुद्रप्रसाद पण्डित र महासंघका अध्यक्ष मिनराज कंडेलले खादा, माला र प्रमाणपत्रसहित पचास हजार रुपैयाँको चेक हस्तान्तरण गरी सम्मानित गर्नुभएको थियो  ।

घिमिरेले मुलुकको सहकारी अभियानमा पुर्याएको योगदानको कदर स्वरुप ‘राष्ट्रिय सहकारी पुरस्कार प्रदान गरिएको महासंघले जनाएको छ ।