दमक । डाँफे सामुदायिक बचत तथा ऋण सहकारी संस्था लिमिटेडले आफ्नो १६औं स्थापना दिवसको अवसरमा असार २० गते सेयर सदस्यहरुलाई सम्मान तथा पुरस्कार प्रदान गरेको छ । 
विभिन्न विधामा उत्कृष्ट स्थान हासिल गरेका ३८ सेयर सदस्यहरु साकोसबाट सम्मानित भएका थिए । सदस्य नै साकोसका मालिक भएको  हुँला सदस्य क्रियाशिलता अभिवृद्धि गर्न असल सदस्यहरुलाई सम्मान तथा पुरस्कारको व्यवस्था गरिएको साकोसले जनाएको छ । 

सो अवसरमा साकोसद्वारा नेपाल रेडक्रस सोसाइटी उपशाखा दमकको प्राविधिक सहयोगमा रक्तदान कार्यक्रमको समेत आयोजना गरिएको थियो । 

साकोसको १६औं स्थापना दिवस विशेष समारोहको समुद्घाटन नेपाल बचत तथा ऋण केन्द्रीय सहकारी संघ लि.( नेफ्स्कून) का अध्यक्ष परितोष पौड्यालले गर्नुभएको थियो । अध्यक्ष पौड्यालले साकोसलाई शुभकामना दिँदै साकोसले आफ्ना सदस्य र उनीहरुको परिवारको शिक्षा, स्वास्थ्य एवम् खानपान गुणस्तरीय बनाउन भूमिका खेल्नुपर्ने बताउनुभयो । उहाँले सदस्यहरुलाई आय आर्जन र धन सृजनाको श्रंखलामा जोड्न विभिन्न व्यावसायिक सीप विकास तथा तालिमहरुमा जोड्नपर्ने बताउनुभएको थियो । 

नेफ्स्कूनका सञ्चालक सदस्य घनश्याम अधिकारीले बचतलाई उत्पादनसँग जोड्न र सदस्यहरुलाई आत्मनिर्भरता तर्फ उन्मुख गराउन साकोसहरुको भूमिका महत्वपूर्ण हुने बताउनुभयो ।

संस्थाका अध्यक्ष तुलाराम न्यौपानेको अध्यक्षतामा सम्पन्न स्थापना दिवस समारोहमा साकोसका वित्तीय कारोबारको अवस्था प्रस्तुतीकरण सहित साकोसले गरेका सामाजिक आर्थिक क्रियाकलापहरुका बारेमा जानकारी गराइएको थियो ।

कार्यक्रममा साकोसका उपाध्यक्ष सन्तोष श्रेष्ठले स्वागत गर्नुभएको थियो भने कार्यक्रम सञ्चालन सचिव लिलानाथ खनालले गर्नुभएको थियो ।