सुर्खेत । बीरेन्द्रनगर नगरपालिका र नेपाल बचत तथा ऋण केन्द्रीय सहकारी संघ लि (नेफ्स्कून) को संयुक्त  आयोजनामा विरेन्द्रनगर नगरपालिका भित्रका सहकारी संस्थाहरुका लागि कर्जा जोखिम व्यवस्थापन तालिम सञ्चालन भएको छ  । तालिम बीरेन्द्रनगर नगरपालिका, नगरकार्यपालिकाको कार्यालयको तर्फ बाट सहकारी तथा गरिबी निवारण शाखा प्रमुख निर्मला भट्टराईको अध्यक्षतामा सुरु भएको थियो । 

शाखा प्रमुख निर्मला भट्टराईले सहकारीहरुमा हाल देखिएको कर्जा जोखिम समस्याहरुलाई व्यवस्थापन गर्न यस नगरपालिका भित्र रहेका सहकारी संस्थाहरुलाई लक्षित गरेर तालिम आयोजना गरिएको बताउनुभयो । 

असार २२ र २३ गते सञ्चालित दुई दिने तालिममा बीरेन्द्रनगर नगरपालिका का विभिन्न बचत तथा ऋण सहकारी, बहुउद्देश्यीय र कृषि सहकारी संस्था गरी ३१ सहकारीका प्रतिनिधिहरुको सहभागिता रहेको थियो । तालिमको सहजीकरण नेफ्स्कूनका कार्यक्रम अधिकृत गणेश प्रसाद रेग्मीले गर्नुभएको थियो  साथै कार्यक्रम सञ्चालन र व्यवस्थापन नेफ्स्कून सुर्खेत फिल्ड कार्यालय सहायक मदन कुमार चन्दले गर्नु भएको थियो ।