बेलबारी, मोरङ । सहकारी ऐन, २०७४ को पहिलो संशोधन, २०८३ ले व्यवस्था गरेको दफा ५० को उपदफा (९) कार्यान्वयन गर्दै प्रस्तावित बचत सहकारी बैंक गठन प्रक्रियाका विषयमा मोरङको बेलबारीमा गहन छलफल तथा सुझाव संकलन कार्यक्रम भएको छ ।

असोज ०८ गते जिल्ला बचत तथा ऋण सहकारी संघ लि. मोरङको सभाहलमा आयोजित कार्यक्रममा ३४ जना सहकारी अभियानकर्मी, व्यवस्थापक तथा सरोकारवाला निकायका प्रतिनिधिहरूको सहभागिता रहेको थियो ।

कार्यक्रमको अध्यक्षता नेपाल बचत तथा ऋण केन्द्रीय सहकारी संघ लि.का उपाध्यक्ष एवं प्रस्तावित बचत सहकारी बैंक स्थापना कार्यदलका संयोजक शान्ति अधिकारीले गर्नुभएको थियो । उहाँले जिल्ला–जिल्लामा पुगेर सहकारी अभियानसँग जोडिएका संघ–संस्थाका सुझाव संकलन गरी दिगो, सुरक्षित र अभियानमैत्री बैंकको अवधारणा विकास गर्न कार्यदलले काम गरिरहेको जानकारी दिनुभयो । 

कार्यक्रममा नेफ्स्कूनका सञ्चालक सदस्य एवं प्रस्तावित बचत सहकारी बैंक स्थापना कार्यदलका सदस्य खेमराज सुवेदीले बैंक स्थापनाको अवधारणासम्बन्धी मस्यौदाबारे जानकारी गराउनुभएको थियो ।

त्यसैगरी, बागमती प्रदेश बचत तथा ऋण सहकारी संघका अध्यक्ष एवं बैंक स्थापना कार्यदलका सदस्य उद्धव सापकोटाले सुरक्षित र दिगो बैंक स्थापनाका लागि कार्यदलले विभिन्न क्षेत्रबाट सुझाव संकलन गरी आवश्यक तयारी अघि बढाइरहेको बताउनुभयो ।

कार्यक्रमको स्वागत जिल्ला बचत तथा ऋण सहकारी संघ लि. मोरङका वरिष्ठ उपाध्यक्ष एकराज निरौलाले गर्नुभएको थियो भने सञ्चालन शालिकराम ढकालले गर्नुभएको थियो । कार्यक्रममा संघका वरिष्ठ अधिकृत भरतप्रसाद न्यौपाने, व्यवसाय अधिकृत रिषभराज रेग्मी तथा व्यवसाय सहायक रामहरि भट्टराई लगायतको उपस्थिति रहेको थियो ।

सहकारी ऐन, २०७४ को पछिल्लो संशोधन, २०८३ को दफा ५० को उपदफा (९) अनुसार बचत तथा ऋणको कारोबार गर्दै आएका जिल्ला, प्रदेश तथा केन्द्रीयस्तरका सहकारी संघहरूले आपसमा मिली एकपटकका लागि सहकारी बैंक स्थापना गर्न सक्ने व्यवस्था गरिएको छ । उक्त व्यवस्था कार्यान्वयनमा आएको मितिले तीन वर्षभित्र ऐनको दफा १२, परिच्छेद–८ तथा २०८३ भदौ ५ गते सहकारी रजिस्ट्रारको कार्यालयबाट जारी निर्देशनबमोजिम बैंक गठन प्रक्रिया अघि बढाउन लागिएको नेफ्स्कूनले जनाएको छ ।