न्यूरोड, काठमाडौं । कदर बचत तथा ऋण सहकारी संस्था लि।को आयोजना तथा नेफ्स्कूनको प्राविधिक सहजीकरणमा असोज १० गते एकदिने भावी नेतृत्व अभिमुखीकरण तालिम सम्पन्न भएको छ।

संस्थाको १७औँ वार्षिक साधारणसभाको पूर्वसन्ध्यामा सञ्चालक समिति तथा लेखा सुपरिवेक्षण समितिको निर्वाचनसमेत हुने भएकाले उक्त तालिम आयोजना गरिएको संस्थाले जनाएको छ।

तालिमले सहकारी व्यवस्थापनमा सदस्य–नेतृत्वको सहभागितालाई कसरी प्रभावकारी बनाउन सकिन्छ भन्ने विषयमा सहभागीलाई व्यावहारिक ज्ञान तथा दृष्टिकोण प्रदान गरेको थियो।

तालिममा २५ जनाको सहभागिता रहेको थियो । कार्यक्रममा सहकारीको अवधारणा, सहकारी व्यवसाय, सञ्चालक समिति तथा लेखा सुपरिवेक्षण समितिसम्बन्धी कानुनी व्यवस्था, ती पदमा उम्मेदवार हुन आवश्यक योग्यता, सञ्चालक समिति तथा लेखा सुपरिवेक्षण समितिको काम, कर्तव्य र अधिकार, सेवा, सर्त तथा सुविधा, समितिको व्यावसायिक आचारसंहिता, सञ्चालक समिति, लेखा सुपरिवेक्षण समिति, उपसमिति तथा व्यवस्थापनको भूमिका र अन्तरसम्बन्धलगायतका विषयमा छलफल गरिएको थियो।

नेफ्स्कूनका कार्यक्रम अधिकृत सन्दिपराज ढकालले उक्त विषयमा प्रस्तुतीकरण गर्नुभएको थियो। प्रस्तुतीकरणपछि सहभागीहरूबीच विषयगत रूपमा विस्तृत छलफलसमेत भएको संस्थाका अध्यक्ष वीरेन्द्रमान शाक्यले जानकारी दिनुभयो।