काठमाडौं । मधेश प्रदेशमा सञ्चालित सहकारीहरुलाई लक्षित गरी सिरहाको लहानमा बचत तथा ऋण संस्थाहरुका लागि कोपोमिस तालिम प्रदान गरिएको छ । 

तालिमको शुभारम्भ सिरहा जिल्ला बचत संघका अध्यक्ष सञ्जय कुमार महतोको अध्यक्षता र सप्तरी जिल्ला बचत संघका वरिष्ठ उपाध्यक्ष भवानी प्रसाद चौधरीको प्रमुख आतिथ्यतामा भएको थियो । 

नेफ्स्कूनद्वारा आयोजित तालिममा सिरहा र सप्तरीका ६५ बचत तथा ऋण सहकारी संथाबाट ७१ जना साकोस प्रतिनिधिहरुको सहभागिता रहेको थियो । तालिमको सहजीकरण नेफ्स्कूनका सूचना प्रविधि अधिकृत राजन सुवेदीले गर्नुभएको थियो । 

सहकारी तथा गरिबी सम्बन्धी व्यवस्थापन सूचना प्रणाली (कोपोमिस) लाई सहकारी संस्थामा पूर्ण कार्यान्वयनमा ल्याउनका लागि नेफ्स्कूनले फिल्ड कार्यालयहरु मार्फत देशव्यापी कार्यक्रम सञ्चालन गरिरहेको छ ।