काठमाडौं । जोखिममा आधारित साकोस सुपरिवेक्षण कार्यक्रम (कर्ब्स) अन्तर्गत चन्द्रागिरी समुहका साकोसहरुबीच ११औं कार्यकुशलता तथा सिकाई व्यवस्थापन कार्यशाला सम्पन्न भएको छ । ध्रुवलक्ष्मी साकोसको आयोजनामा थानकोटमा सम्पन्न कार्यशालाको उद्घाटन नेफ्स्कूनका कोषाध्यक्ष दिपक पनेरुले गर्नुभएको थियो । साकोसका अध्यक्ष गोविन्द थापाको अध्यक्षता रहेको उक्त कार्यशालामा कर्ब्स समुहमा आवद्ध साकोसका व्यवस्थापकहरु, आयोजक साकोसका पदाधिकारी साथै सञ्चालक समिति सदस्यहरु र कर्मचारीहरुको उपस्थिति थियो । 

नेफ्स्कूनका कोषाध्यक्ष एवम् प्रमुख अतिथि पनेरुले हालको विषम परिस्थितिमा साकोसहरुले पहिले आफ्नो आन्तरिक समस्या समाधान तर्फ लाग्नु पर्ने बताउनुभयो । “समय अनुसार चल्नुपर्छ, वित्तीय सहकारीमा यतिवेला जोखिमको अवस्था सृजित छ, जोखिम सुपरिवेक्षण नियमित रुपमा गरि योजनाबद्ध कार्यक्रम मार्फत अगाडि बढ्नुहोस्”,उहाँले भन्नुभयो । स्तरीकरण कार्यक्रम मार्फत साकोसले आफ्ना कार्यकुशलता अभिवृद्धि गरी सदस्य सन्तुष्टिलाई प्राथमिकतामा राख्नुपर्नेमा कोषाध्यक्ष पनेरुले जोडदिनुभएको थियो  । 

चन्द्रागिरी समुह अन्तर्गत युगबाणी साकोस, जनश्रमिक साकोस, चम्किलातारा महिला साकोस, श्री सगरमाथा साकोस, कादम्बिनी साकोस, गुर्जुधारा साकोस र धु्रवलक्ष्मी साकोस रहेका छन् । 
जिल्ला संघ साझेदारी कार्यक्रम अन्तर्गत सञ्चालित कर्ब्स कार्यकुशलता तथा सिकाई व्यवस्थापन कार्यशालाको सहजीकरण नेफ्स्कूनकी कार्यक्रम अधिकृत सोबिता मैनाली र कास्कूनका कार्यक्रम अधिकृत नवराज सुबेदीले गर्नुभएको थियो ।

कार्यक्रम सञ्चालन ध्रुवलक्ष्मी साकोसकी सचिब अम्बिका थापाले गर्नुभएको थियो  ।