बर्दिया । सिको बचत तथा ऋण सहकारी संस्था लि.को सञ्चालकहरुको क्षमता अभिवृद्धि तालिम ऋग्म्ऋऋ मंगलबार सम्पन्न भएको छ । तालिमको समापन साकोसका अध्यक्ष दामोदर अधिकारीको अध्यक्षता र नेफ्स्कूनका लेखा सुपरिवेक्षण समितिका संयोजक नवराज सापकोटाको प्रमुख आतिथ्यतामा भएको थियो । 

प्रमुख अतिथि सापकोटाले सिको साकोस लुम्विनी प्रदेश कै उत्कृष्ट साकोसको रुपमा रहेको बताउनुभयो । उहाँले सञ्चालकहरुको क्षमता अभिवृद्धि तालिम उत्कृष्ट तालिम रहेको हुँदा यसबाट प्राप्त सैद्धान्तिक र व्यवहारिक ज्ञान सीप  साकोसमा लागु नगरेसम्म तालिमको कुनै अर्थ नरहने स्पष्ट पार्नुभयो । तालिम पश्चात साकोस सञ्चालनमा के कस्ता परिवर्तन आए भन्ने विषयमा पनि समय समयमा मुल्यांकन गर्नुपर्नेमा उहाँले जोड दिनुभयो ।  

तालिमको समापनका अवसरमा बोल्दै साकोसका अध्यक्ष अधिकारीले सिको साकोस सहकारीको मूल्य, मान्यता, सिद्धान्त अनुसार सञ्चालन भएको  र नेफ्स्कूनबाट प्रवर्द्धित प्रोबेशन र एक्सेसका ब्राण्ड प्राप्त गरी कार्यक्रममा निरन्तरता दिइरहेको बताउनुभयो । उहाँले तालिममा सिकेका कुराहरुलाई कर्मचारीहरुले संस्थामा लागु गर्ने सवालमा सञ्चालकहरुको तर्फबाट पूर्ण साथ सहयोग रहने बचतबद्धता व्यक्त गर्नुभयो ।  साकोस नियामक निकाय र अभियानबाट जारी निर्देशनहरुको अक्षरशः पालना गर्न र नीति, विधि र प्रविधिमा सञ्चालन गर्न प्रतिबद्ध रहेको समेत अध्यक्ष अधिकारीले स्पष्ट पार्नुभयो । 

भाद्र ४ देखि ७ गतेसम्म सञ्चालित तालिमको सहजीकरण नेफ्स्कूनका सहायक कार्यकारी अधिकृत एवम् व्यवसाय विभाग प्रमुख दुर्गा प्रसाद ढकाल र तालिम अधिकृत सुमनराज घिमिरेले गर्नुभएको थियो । 

तालिम पश्चात साकोसका सञ्चालक सदस्य शंकर रोकाया र सुस्मा खड्काले तालिमबाट पर्याप्त ज्ञान सीप प्राप्त भएको र यसलाई साकोसमा व्यावहारिक रुपमा प्रयोगमा ल्याउन प्रतिबद्ध रहने बचनबद्धता व्यक्त गर्नुभयो ।  

कार्यक्रम सञ्चालन साकोसका महासचिव प्रकाश कुमार आचार्यले गर्नुभएको थियो ।